Տնտեսական համեստ աճի մեջ ի՞նչ դերակատարում ունեն ՀՀ շուրջ անվտանգային մարտահրավերներն ու տարածաշրջանային անկայունությունը՝ հարցադրմանն ի պատասխան՝ տնտեսագետ Հրանտ Միքայելյանն արձագանքեց համեստ ներդրումների օրինակով։
«Նույնիսկ անցյալ տարվա ներդրումների առումով արձանագրված աճը, մեծամասամբ, կեղծ է եղել, որովհետև մի ֆինանսական գործարք, որը հավանաբար ՌԴ բիզնեսն օգտագործել է Էմիրությունների միջոցով ՀՀ գումարներ հասցնելու համար, դա մեր վիճակագրության մեջ գրվել է՝ որպես խոշոր ներդրում։ Իսկ դրանից զատ՝ ներդրումները շատ համեստ են։
Ի դեպ, կտրուկ նվազել են ներդրումները Ռուսաստանից և Կիպրոսից (Կիպրոսը ևս օգտագործվում է ռուսական բիզնեսի կողմից), բայց դրան համապատասխան չկա աճ ուրիշ երկրներից, որպեսզի կոմպենսացնի դա,- մանրամասնեց տնտեսագետը՝ նկատելով, որ ռուսական ներդրումների կրճատման մեջ երկու գործոն է դեր ունեցել,- Առաջինը՝ ՀՀ-ՌԴ հարաբերությունների մակարդակը, և երկրորդ՝ այն, որ ռուսական բիզնեսը սանկցիաների պատճառով սեղմվում է՝ ավելի շատ ակտիվություն ցուցաբերելով հենց ՌԴ-ում՝ արտաքին շուկաներ վերադառնալու վերադասավորումների համար»։
Մասնագետը, սակայն, մի փաստ արձանագրեց, որը, ըստ նրա, բավականին տարօրինակ է․ դրսի ու մասնավորապես պոտենցիալ ներդրողների ընկալումը ռիսկերի առումով շատ չի տարբերվում այժմ ու նախորդ ժամանակահատվածներում։
Կարդացեք նաև
«Այսինքն, երբ Հայաստանն ու Արցախն անվտանգային առումով շատ ավելի ապահով էին, մեկ է՝ մեզ հետ տնտեսական գործունեության մեջ միշտ դրվում էր այդ պատերազմի ռիսկը։ Հիմա՝ տարօրինակաբար, բայց այդ ռիսկը դիտարկվում է մոտավորապես նույնը, մինչդեռ այսօր անվտանգային առումով չափազանց վատ է վիճակը»,- նշեց Հրանտ Միքայելյանը։
Զարուհի ԴԻԼԱՆՅԱՆ
Հոդվածն ամբողջությամբ՝ «168 ժամ» շաբաթաթերթի այս համարում
