ԱՄՆ սենատոր Ռոբերտ Մենենդեսի նկատմամբ կոռուպցիայի գործով իրականացվող դատավարությունն ավարտվել է, և ամերիկացի օրենսդիրը մեղավոր է ճանաչվել ներկայացված բոլոր մեղադրանքների գծով։ Այնինչ, Մենենդեսն իրեն մեղավոր չի ճանաչում։
ԱՄՆ ամենաազդեցիկ սենատորներից մեկը՝ Ռոբերտ Մենենդեսը, մեղավոր է ճանաչվել հարյուր հազարավոր դոլարներ կաշառք ստանալու, պաշտոնական դիրքը չարաշահելու մեջ: Ըստ մեղադրական կողմի, սենատորը և նրա կինը՝ Նադին Մենենդեսը, կաշառք են ստացել հարյուր հազարավոր կանխիկ դոլարների, ոսկու ձուլակտորների, ավտոմեքենաների տեսքով, երեք գործարարներ նրա օգտին կատարել են հիփոթեքային վճարներ: Դատախազների խոսքով, փոխարենը, Մենենդեսը օգնել է, որպեսզի Եգիպտոսը միլիարդավոր դոլարների օգնություն ստանա Միացյալ Նահանգներից։ Հաղորդվում է, որ եգիպտացի գործարարներից մեկը՝ Վաել Հանան, կապեր ուներ տեղի պաշտոնյաների հետ:
Մենենդեսը մեղադրվում է նաև երկու այլ գործարարների՝ Ֆրեդ Դայբեսի և Խոսե Ուրիբեի դեմ քրեական հետաքննության ընթացքի վրա ազդելու փորձի մեջ։
«Սա սովորական քաղաքականություն չէր, այլ քաղաքականություն էր շահի համար: Եվ այժմ, երբ երդվյալ ատենակալները դատապարտեցին Բոբ Մենենդեսին, վերջապես ավարտին հասավ նրա այդ գործելակերպը»,- ասել է ԱՄՆ դաշնային դատախազ Դեմիան Ուիլյամսը:
Կարդացեք նաև
Մենենդեսի պաշտպանների պնդմամբ, նրա գործունեությունը չէր հակասում սենատորի պարտականություններին: Փաստաբանական թիմը փորձում էր մեղադրանքի հիմնական մասը բարդել նրա կնոջ վրա, որը դատախազների կարծիքով՝ միջնորդ էր կաշառք ստանալու հարցում, և որ ոսկու ձուլակտորները հայտնաբերվել են հենց նրա պահարանում։ Նրանք պնդում էին, թե զույգը գրեթե առանձին է ապրել, և որ Նադին Մենենդեսը ամուսնուն չի տեղեկացրել իր ֆինանսական գործերի մասին:
Ըստ պաշտպանական կողմի, սենատորը կանոնավոր կերպով կանխիկ գումար է հանել բանկերից և տասնամյակներ շարունակ պահել տանը: Նրա ավագ քույրը վկայել է, որ Մենենդեսը սովորություն ունի պահել կանխիկ գումար՝ սովորություն, որը նա ժառանգել է Կուբայից ներգաղթած ծնողներից:
Հայազգի Նադին Արսլանյան-Մենենդեսը չի մասնակցել Բոբ Մենենդեսի դատավարությանը, քանզի նրա մոտ քաղցկեղ է ախտորոշվել: Նա դատարան կներկայանա ավելի ուշ։
Երդվյալ ատենակալների որոշման հետ սենատորը կտրականապես համաձայն չէր:
«Խորապես հիասթափված եմ ատենակալների որոշումից։ Լիովին հավատացած եմ, որ այդ որոշման հիմքում օրենքն ու փաստերը չեն, և որ մենք հաջողության կհասնենք բողոքարկման ժամանակ: Երբեք չեմ խախտել իմ երդումը։ Մշտապես եղել եմ հայրենասերը։ Երբեք օտարերկրյա գործակալ չեմ եղել»,- ասել է Մենենդեսը:
Երդվյալ ատենակալները անցան քննարկման անցած ուրբաթ, և երեք օրվա ընթացքում պահանջվեց ավելի ավելի քան 12 ժամ նման որոշում կայացնելու համար:
«Սա պատմական դատավճիռ է, քանի որ սենատոր Մենենդեսը ոչ միայն դատապարտված է կոռուպցիայի, այլև որպես օտարերկրյա կառավարության գործակալ հանդես գալու մեջ»,- ասել է ԱՄՆ նախկին դաշնային դատախազ Նեամա Ռահմանին:
Ռահմանիի խոսքով, դատավճռի հետևանքով սենատորը կարող է երկար տարիներ անցկացնել անազատության մեջ:
Մանրամասները՝ սկզբնաղբյուր կայքում:
