Shamshyan.com. Հուլիսի 13-ին առեղծվածային դեպք է տեղի ունեցել Արագածոտնի մարզում: Ժամը 09:30-ի սահմաններում ՀՀ ներքին գործերի նախարարության ոստիկանության Արագածի բաժին են դիմել Ծաղկահովիտ բնակավայրի բնակիչ 32-ամյա Արտակ Ն.-ի հարազատները և հայտնել են, որ Արտակ Ն.-ն առավոտյան ժամը 08:00-ի սահմաններում տնից դուրս է եկել Շիրակի մարզ մեկնելու, դեղ գնելու նպատակով, սակայն մինչև այժմ նրանից տեղեկություններ չունեն և հայտնել են, որ ունեն կասկածներ, որ նրա հետ ինչ-որ վատ բան է պատահել:
ՀՀ ՆԳՆ ոստիկանության Արագածոտնի մարզային վարչության ծառայողները, ՀՀ ՆԳՆ ոստիկանության Պարեկային ծառայության Արագածոտնի մարզի գումարտակի պարեկները, Ծաղկահովիտ գյուղի բնակչության մեծ մասը, ինչպես նաև ՀՀ ՆԳՆ փրկարար ծառայության Արագածոտնի մարզային փրկարարական վարչության, Աշտարակի, Ապարանի և Արագածի փրկարարները կինոլոգների հետ 10 ժամից ավելի որոնողական աշխատանքներ են կատարել՝ Արտակ Ն.-ին հայտնաբերելու ուղղությամբ:
Գեղաձոր-Հնաբերդ ճանապարհահատվածում հայտնաբերվել է նրան պատկանող «Kia» մակնիշի ավտոմեքենան՝ ճամփեզրին կայանված, դռները բաց վիճակում:
Ավտոմեքենայի մեջ հայտնաբերվել են անձնական իրերը:
Կարդացեք նաև
Արդեն գիշերը՝ ժամը 21:30-ի սահմաններում, նրան Ծաղկահովիտ բնակավայրի սկզբնամասում իր ազգականը հայտնաբերում է, որից հետո նրանք ներկայանում են ոստիկանության Արագածի բաժին:
Ֆոտոլրագրողի հետ զրուցում նրա հարազատներն ասում էին, որ նրա նկատմամբ հավանաբար հաշվեհարդար են տեսել, քանի որ երբ 1 օր առաջ ՀՀ վարչապետ Նիկոլ Փաշինյանը այցելել է Արագածոտնի մարզ, Լեռնապար գյուղում ինքը վարչապետին դժգոհել է ճանապարհների ոչ որակյալ ասֆալտապատման համար, հայտնել է, որ ավարտին չի հասցվում Ծաղկահովիտ գյուղի հիվանդանոցի վերանորոգման աշխատանքները, ու հարազատները ասում էին, որ դա է եղել պատճառը, որ նրան առևանգել են:
Դեպքի փաստով Արագածոտնի մարզային քննչական վարչությունում նախաձեռնվել է քրեական վարույթ:
Ֆոտոլրագրողի տեղեկություններով՝ Արտակ Ն.-ն Ծաղկահովիտ համայնքի սոցիալական աջակցության հարցերով բաժնի պետն է, որը Ծաղկահովիտում ունի նաև ատամնաբուժարան:
Իրավապահներն էլ ունեն կասկածներ, որ ոչ մի առևանգում տեղի չի ունեցել և նրա անհետանալը կապ չունի նրա հարազատների կողմից բարձրաձայնված այն խնդիրների հետ, որ եթե նա վարչապետին ոչ հաճելի հարցեր չտար, ապա նրա հետ այս դեպքը տեղի չէր ունենա:
Հարազատերը նշում էին նաև, որ իրենք ՀՀ վարչապետից ու Կառավարությունից ոչ մի դժգոհելու առիթ չեն ունեցել, միշտ աջակցել են Կառավարության ծրագրերին ու վարչապետը ոչ մի կապ չունի այդ դեպքի հետ, այլ ասում էին, որ հնարավոր է՝ ասֆալտապատում կատարող ընկերության մատն է խառը:
Լուսանկարը՝ Գագիկ Շամշյանի
Նյութն ամբողջությամբ՝ սկզբնաղբյուր կայքում:
