«Ազատություն» – Ադրբեջանի ընդդիմադիր «Ժողովրդական ճակատ» կուսակցությունը բոյկոտում է սեպտեմբերի 1-ին կայանալիք արտահերթ խորհրդարանական ընտրությունները։ «Թուրան» գործակալության փոխանցմամբ՝ այս որոշումը հուլիսի 13-ին ընդունել է կուսակցության Գերագույն Մեջլիսը։
«Հաշվի առնելով, որ ավելի քան 300 քաղբանտարկյալներ դեռ ազատ չեն արձակվել երկրում, հավաքների ազատությունն արգելված է, ընտրական հանձնաժողովները գտնվում են իշխանությունների լիակատար վերահսկողության ներքո, քվեարկության գործընթացի և ձայների հաշվարկի վերահսկողությունն անհնար է, ազատ մամուլը եղել է ավերված, ընտրություններին անկախ տեղական դիտորդների կողմից դիտորդություն չի թույլատրվում, ինչպես նաև չկա մրցակցային և արդար ընտրական միջավայր, 2024 թվականի սեպտեմբերի 1-ին նշանակված Միլլի Մեջլիսի արտահերթ ընտրությունները բոյկոտվելու են»,- ասված է հաղորդագրությունում:
Միլի մեջլիսը ցրելու և արտահերթ ընտրություններ նշանակելու կարգադրությունը հունիսի վերջին ստորագրել է երկրի նախագահ Իլհամ Ալիևը։ Ադրբեջանի ընտրատարածքային հանձնաժողովներում արտահերթ խորհրդարանական ընտրություններում թեկնածուների գրանցման փաստաթղթերն ընդունվում են հուլիսի 13-ից:
