«Այն հակաքարոզչությունը, որն իրականացվում է «Սրբազան պայքարի» դեմ, աննախադեպ է: Այն բոլոր լուտանքները, ցինիկ հայտարարությունները, որ փորձել են կպցնել շարժմանը, իբր թե մենք այս կամ այն երկրի ագենտներն են, լրտեսներն ենք, ինչ-որ պրոյեկտներ եք, այս կամ այն շրջանակի հետ ենք կապված՝ նմանատիպ պառակտիչ գործունեությամբ ուզում են շարժման վրա մեծ բիծ դնել, որ այն մարդկանց, ովքեր մեր աջակիցներն են, փորձեն հետ պահեն: Եթե ՀՀ-ում կա օտարերկրյա շահերը սպասարկող ուժ, դա իշխող ՔՊ-ն է ու իշխանական խմբակն է»,- այսօր Աբովյանում աջակիցների հետ հանդիպման ժամանակ ասաց «Տավուշը հանուն հայրենիքի» շարժման անդամ, «Հայաստան» խմբակցության պատգամավոր Գառնիկ Դանիելյանը:
Նա նշեց, որ քանի որ ՀՀ իշխանությունները ճանաչել են Արցախը Ադրբեջանի կազմում, Ադրբեջանը հսկայական պահանջներ է դնում դրա դիմաց, փոխհատուցում ու տարածքներ է ուզում, ասում է՝ Սեւանով կփակվես. «Հիմա գործակալը ո՞վ է: Արդեն հասել է նրան, որ Ադրբեջանը պահանջում է ՀՀ-ում սահմանադրական փոփոխություններ: Տավուշի մարզից ահազանգեր ենք ստանում, որ շրջակա գյուղերի խաչերի լույսերը անջատել են, տեղեկություններ կան, որ իշխանությունների հրահանգով սկսել են ապամոնտաժման գործընթաց, հաջորդը ադրբեջանցիների՝ այստեղ վերաբնակեցումն է, որը Ադրբեջանի պահանջն է: Հլու-հնազանդ կատարում են Ադրբեջանի բոլոր պահանջներն ու այս շարժմանը անուն են դնում, որը մաքուր ազգային-հայկական շարժում է ու սպասարկում է միմիայն հայ ժողովրդի շահերը: Մեզ ասում են՝ Արցախի անունը քիչ տվեք, հայկական գաղափարների մասին քիչ խոսեք, եկեղեցի, կրոն…թողեք մարդիկ հանգիստ ապրեն, հաճույքներ ստանան, վայելեն կյանքը, իրենց քարոզչությունը դա է: Հիմա Աժ-ում բոլորին հատիկ-հատիկ զգուշացրել են Արցախի անունը չտան, այն նախարարը, որը տալիս է, խիստ նկատողություն են անում»:
Հռիփսիմե ՋԵԲԵՋՅԱՆ
