«Վարչապետի հայտնի աղմկահարույց ասուլիսից հետո, որը տեղի էր ունեցել 2023թ հուլիսի 25-ին, իմ եւ Անի Գեւորգյանի դեմ արշավ էր սկսվել, աջակիցները որեւէ կերպ չէին մարսել մեր հնչեցրած հարցերն՝ ուղղված իրենց սիրելի վարչապետին»,- «Հենարան» մամուլի ակումբում ասաց «Առավոտի» լրագրող Հռիփսիմե Ջեբեջյանը՝ ներկայացնելով իր ու Անի Գևորգյանի դատական գործի մանրամասները:
«Մինչ օրս դատական հայցեր չեն եղել, լրագրողները միշտ հանդուրժել են իրենց հասցեին հնչեցրած վիրավորանքները, զրպարտությունները, որովհետեւ գլուխ չեն դրել նման գործընթաց սկսելու համար: Մենք որոշեցինք կոտրել այդ կարծրատիպը եւ նախադեպ ձեւավորել մեդիա դաշտի համար, որովհետեւ այլեւս անհանդուրժելի էին լրագրողների հանդեպ ոտնձգությունները»,-հավելեց Հռիփսիմե Ջեբեջյանը:
«Հռիփսիմեի վճիռները նախադեպային են, որովհետեւ չի եղել, որ մեկնաբանության համար դիմեն դատարան, վիրավորանքի համար դիմեն դատարան, այստեղ մենք գործ ունենք քաղաքացիների եւ աջակիցների հետ, ոչ թե հանրային դեմքի հետ…Մեզանից տեւական ժամանակ է պահանջվել, որպեսզի կարողանանք նույնականացնել, թե ովքեր են, իրական օգտատերեր են, թե ֆեյքեր»,-ասաց Անի Գեւորգյանը:
Փաստաբան Շուշան Ավետիսյանը նշեց, որ 4 հայց են ներկայացրել տարբեր դատարաններ. «Հուրախություն բոլորիս՝ ունենք դատական ակտ, որով բավարարվել են երկու հայցերը: Այս պահին իմ ձեռքի տակ է Հռիփսիմե Ջեբեջյանն ընդդեմ Դիանա Մարտիրոսյանի վճիռը: Դատարանը վճռել է «Հռիփսիմե Հակոբի Ջեբեջյանի հայցն ընդդեմ Դիանա Արթուրի Մարտիրոսյանի՝ հրապարակային արտահայտված վիրավորանքից, պատիվն ու արժանապատվությունը պաշտպանելու պահանջի մասին», բավարարել մասնակի»: Փաստաբանն ասաց, որ դատարանը որոշել է պարտավորեցնել պատասխանող Դիանա Մարտիրոսյանին ֆեյսբուքի իր էջում, որտեղ հրապարակվել էր գործով որպես վիրավորանք գնահատված արտահայտությունը, հրապարակայնորեն, բոլորին հասանելի ռեժիմով ներողություն խնդրել հայցվորից՝ Հռիփսիմե Ջեբեջյանից: Դատարանը նաեւ նշել է ներողության տեքստը:
Կարդացեք նաև
Մանրամասն՝ տեսանյութում.
Գոհար ՀԱԿՈԲՅԱՆ
