«Ինձ ոչ ոք չի դիմել, ես եմ անընդհատ անհանգստացրել իմ գործընկերներին, ես պատրաստակամ եմ»,- դատարանում հայտարարեց ՀՀ նախկին վարչապետ, ԱԺ նախկին նախագահ Խոսրով Հարությունյանը՝ ներկայացնելով ՀՀԿ փոխնախագահ Արմեն Աշոտյանին ազատ արձակելու միջնորդությունը։
Խոսրով Հարությունյանը հայտարարեց, որ իր կենսագրության ընթացքում ինքը Արմեն Աշոտյանի հետ երկար ու կարեւոր ճանապարհ է անցել ու իր հեղինակության ձեւավորման հարցում նաեւ Արմեն Աշոտյանն է մեծ նպաստ ունեցել։
Մանրամասները՝ տեսանյութում
Կարդացեք նաև
Հիշեցնենք, ՀՀ հակակոռուպցիոն դատարանում այսօր դատավոր Վահե Դոլմազյանի նախագահությամբ, շարունակվեց ՀՀԿ փոխնախագահ Արմեն Աշոտյանի եւ մյուսների գործով դատը: Դատարանն այսօր քննում է Արմեն Աշոտյանի խափանման միջոցի հարցը։
ԱԺ նախկին նախագահ Տիգրան Թորոսյանն էլ ասաց, որ իր նախաձեռնությամբ է միջնորդություն ներկայացրել ու հավելեց՝ մեր կյանքը կարգավորվում է ոչ միայն իրավական նորմերով, այլ բարոյական նորմերով, արժեքներով եւ սկզբունքներով։ Միաժամանակ, Տիգրան Թորոսյանը նաեւ նկատեց, որ կալանքը ծայրահեղ խափանման միջոց է, բայց այստեղ որեւէ մեկի մեղքը դեռ չի հաստատվել։
Մանրամասները՝ տեսանյութում
Արմեն Աշոտյանի պաշտպան Ռուբեն Մելիքյանը՝ հակադարձելով դատախազի պնդմանը, հայտարարեց՝ Աշոտյանին կալանքի տակ պահելու հիմք այլեւս առկա չէ։ Պաշտպանը նաեւ միջնորդեց՝ Արմեն Աշոտյանի նկատմամբ այլընտրանքային խափանման միջոց՝ տնային կալանք, համակցված գրավով, կիրառել։
Մանրամասները՝ տեսանյութում
Հիշեցնենք, նաեւ, որ Արմեն Աշոտյանն արդեն մոտ մեկ տարի է՝ անազատության մեջ է։ Ռուբեն Մելիքյանն ուշադրություն հրավիրեց այն հանգամանքին, որ արդեն մեկ տարի է, ինչ Արմեն Աշոտյանն իր քաղաքական գործունեությունն իրականացնում է ճաղավանդակների ետեւում, ընտանիքի անդամների հետ շփվում է ճաղավանդակների ետեւում՝ ժամացույցի առկայությամբ, նույն շփումը՝ նաեւ ընկերների հետ է եւ կոչ արեց դատարանին՝ հաշվի առնել նաեւ բարոյական զրկանքները, որոնք արդեն իրավական հիմք են ստանում։
Արմեն Աշոտյանը եւ գործով մյուս մեղադրյալները մեղադրվում են պաշտոնեական դիրքի չարաշահման եւ պետական միջոցների վատնման մեջ։ Նրանցից, ընդհանուր առմամբ, 905 միլիոն դրամի բռնագանձման պահանջ ունի դատախազությունը։
Նելլի ԳՐԻԳՈՐՅԱՆ
