Այսօր ԱԺ պետաիրավական հարցերի հանձնաժողովի նիստում ՀՀ քննչական կոմիտեի նախագահի տեղակալ Արսեն Այվազյանը ներկայացրեց «Քննչական կոմիտեի» մասին օրենքում լրացում կատարելու նախագիծը:
«Հայաստան» խմբակցության քարտուղար Արծվիկ Մինասյանն իր ելույթում ասաց. «Մայիսի 30-ից տասնյակ մեքենաներ բերման են ենթարկվել պարեկային ծառայություն, մարդկանց մեքենաները հրաժարվում են վերադարձնել՝ հիմնավորմամբ, որ Քննչական կոմիտեն տեսել է որոշակի հանգամանքներ, այս մեքենաների մասով պահանջվում են լրացուցիչ ուսումնասիրություններ, փորձաքննություններ: Հստակ ուղղորդված գործողություն՝ քաղաքական հայացքներով պայմանավորված: Ինչ ասում եմ՝ կոնկրետ փաստերով եմ ասում: Տվյալներն էլ փոխանցված են: Մինչեւ հիմա մարդկանց փաստաթղթերը դրամապանակները, քարտերը չեն վերադարձնում: Գրություններ ուղարկվել են ՄԻՊ գրասենյակ, օմբուդսմենն էլ է մտահոգություն հայտնել այս մասով, բայց ոչ մի տեղաշարժ:
Երկու տարի է օրինական ուժի մեջ մտած դատական ակտը չի կատարվում, գտնվում է ՔԿ նախաքննության փուլում եւ զրո արդյունք, Արման Բաբաջանյանը պետք է կատարի դատական ակտը, չեն գտնում Արման Բաբաջանյանին, բայց այստեղ էր, ԱԺ ամբիոնում մի երկու շաբաթ առաջ ելույթ էր ունենում, գայիք տանեիք: Կամ ծանուցում հանձնեիք, որ գար:
Էդ ինչպե՞ս է ստացվում, որ հենց իշխանությանը քննադատող անձինք ենթադրյալ հակաիրավական արարք են կատարում, որ ենթադրվում է, թե հանցագործություն է, րոպեների ընթացքում ՔԿ-ն ոչ միայն հաղորդագրություն է տարածում, մի հատ էլ օպերատիվ հետախուզական հանձնարարականը ուղարկում է ոստիկանություն, ոստիկանությունը գնում, ասֆալտին փռելով բերում հասցնում է, բայց երբ որ իշխանության համակրանք վայելող անձն է, պարզվում է՝ էդ մարդուն չեն կարողանում հայտնաբերել: Սա՞ է օբյեկտիվությունը, օբյեկտիվ քննությունը»:
Կարդացեք նաև
Հռիփսիմե ՋԵԲԵՋՅԱՆ
