Փաստաբան Ռոման Երիցյանը ֆեյսբուքյան իր էջում գրել է.
«ՀՀ քննչական կոմիտեն այսօր՝ մեկամսյա կալանքի ժամկետը լրանալու շեմին, դիմել է դատարան՝ Երվանդ Աղաբալյանի կալանքի ժամկետը 2 ամսով երկարաձգելու միջնորդությամբ։
Հիշեցնում եմ, որ ըստ նախաքննական մարմնի կողմից դատարան ներկայացված տեսագրության՝ ինչ-որ երիտասարդ, որի դեմքը չի երևում, ականատես լինելով քաղաքացու ձեռքը (դաստակը)՝ լուսաձայնային նռնակը պայթելու հետևանքով պոկվելու տեսարանին, զայրացած վիճակում գետնից վերցնում է դատարկ պլաստմասե շիշ և նետում առաջ։
Ոստիկանը ցուցմունք է տվել, որ այդ երիտասարդը հենց Երվանդն է։
Կարդացեք նաև
Վերը նշվածի պատճառով Աղաբալյանը մեղադրվեց խուլիգանության մեջ և Երևան քաղաքի առաջին ատյանի ընդհանուր իրավասության քրեական դատարանի դատավոր Ջոն Հայրապետյանի որոշմամբ կալանավորվեց մեկ ամիս ժամկետով։ Դատավորը կալանքի հիմքում դրել է միայն վարկածն առ այն, որ մնալով ազատության մեջ Երվանդը կարող է շարունակել խուլիգանական դրդումներով մասնակցել Հայաստանում կազմակերպվող հավաքներին։
Կալանքի ժամկետը երկարաձգելու միջնորդությունը կքննարկվի վաղը՝ ժամը 19:00-ին Երևան քաղաքի առաջին ատյանի ընդհանուր իրավասության քրեական դատարանի «Կենտրոն» նստավայրում։
Հետգրառում. Վաղը կհրապարակվի նաև Երվանդին մեկ ամսով կալանավորելու որոշման դեմ ներկայացված վերաքննիչ բողոքի քննության արդյունքում ընդունված որոշումը»։
