Հասարակական գործիչ Նաիրա Զոհրաբյանը «Հայելի» ակումբում խոսելով Նիկոլ Փաշինյանի արած այն հայտարարության մասին, իբր, ժողովուրդը նոր սահմանադրության կարիք ունի, ասաց. «Նիկոլ Փաշինյանը վերջին շրջանում որդեգրել է ամենավտանգավոր քաղաքականությունը: Այն բոլոր աղետները, անվտանգային բոլոր ռիսկերը, որ նա դեռ պատրաստվում է բերել Հայաստանին, այլեւս դա անում է ժողովրդի անունից:
Եթե նա նախկինում հայտարարում էր, թե ժողովուրդն ինձ տվել է մանդատ՝ անելու այն, ինչ ես որպես վարչապետ նպատակահարմար եմ գտնում, հիմա հասկանալով, որ, միեւնույն է, գալու է իր եւ իր քաղաքական թիմի պատասխան տալու ժամանակը, այլեւս հակահայ ցանկացած քայլ, ՀՀ տարածքային ամբողջականության կորստի ցանկացած իրավական ձեւակերպում գցում է ժողովրդի գրպանը:
Ես ուզում եմ տեսնել վիճակագրություն, որտեղ ժողովուրդը Նիկոլ Փաշինյանին հորդորում է փոխել Հայաստանի Հանրապետության սահմանադրությունը: Նման վիճակագրություն չկա: Դրա փոխարեն հիմա ներկայացնեմ ընդամենը օրեր առաջ Ադրբեջանում Կանադայի դեսպանի հետ հանդիպման ժամանակ Իլհամ Ալիեւի հայտարարությունը: Ալիեւը Կանադայի դեսպանին ասել է հետեւյալը. «Չի լինելու խաղաղության որեւէ պայմանագիր Հայաստանի հետ մինչեւ Հայաստանը չփոխի իր սահմանադրությունը, քանի որ այդ սահմանադրությունը տարածքային պահանջներ է պարունակում Ադրբեջանի նկատմամբ: Եվ քանի դեռ դա տեղի չի ունեցել, խաղաղության պայմանագիր չի ստորագրվելու»:
Եվ ուրեմն, ոչ թե Հայաստանի Հանրապետության քաղաքացիներն են պահանջում եւ ուզում սահմանադրություն փոխել, որովհետեւ «վիձիծե լի» գործող սահմանադրությունը խանգարում է Հայաստանի Հանրապետության քաղաքացիներին, այլ սահմանադրական պահանջ դնում է Ալիեւը: Իսկ ի՞նչ է ուզում Ալիեւը: Կրկնեմ, Ալիեւը ուզում է, որ Հայաստանի սահմանադրությունից հանվի Հայաստանի Երրորդ Հանրապետության ծննդականը, այն է՝ Հայաստանի Հանրապետության Անկախության հռչակագիրը, որով ըստ էության հայտարարվել է Հայաստանի Երրորդ Հանրապետությունը:
Կարդացեք նաև
Ալիեւն ու Նիկոլը ուզում են մորթել, ավարտել, վերջացնել, մեխել Հայաստանի Երրորդ Հանրապետության դագաղի մեխը: Ալիեւը պահանջում է, որ Սահմանադրության զինանշանների նկարագրության բաժնից հանվի Արարատ լեռը որպես ՀՀ զինանշանի խորհրդանիշ: Նոր սահմանադրություն պետք չէ Հայաստանին: Նոր սահմանադրությունը պետք է Ադրբեջանին, որովհետեւ քանի կա այս ռեժիմը, այլեւս Ադրբեջանն է որոշում մեր օրենքները, մեր օրենսդրությունը ու մենք ոնց պիտի ապրենք վաղը»,-ասաց Նաիրա Զոհրաբյանը:
Աշոտ ՀԱԿՈԲՅԱՆ
