«Կարմիր սարը վարչական առումով մի մասը գտնվում է Գինեվետ բնակավայրում, մյուսը՝ Այգեզարդ բնակավայրում։ Անկախ հանքը Գինեվետ բնակավայրում է, թե մեր, վնասները նույնչափ ազդելու են մեզ վրա»,- «Մեդիա կենտրոնում» «Արարատյան դաշտավայրի բնակիչներն ընդդեմ վնասակար հանքարդյունաբերության» թեմայով քննարկման ժամանակ այսպիսի մտահոգություն հայտնեց Այգեզարդ գյուղի նախաձեռնող խմբի համակարգող Արփինե Խաչատրյանը (լուսանկարում)։
Կարմիր սարը, ունենալով կրաքարի պաշարներ, որն օգտագործվում է ցեմենտի արտադրության մեջ, այսօր հայտնվել է միաժամանակ մի քանի հանքարդյունահանողների ուշադրության թիրախում՝ «ՄԼ մայնինգ» ՍՊԸ, «ԴԻԳԸՆԴԻԳ» ՍՊԸ, «ԳՌԱՆՈՒԼՍ» ՍՊԸ, «ՕՐԴ» ՍՊԸ, «ՕՐԴ ԳՐՈՒՊ» ՍՊԸ։ Վերջինս նախատեսում է Վեդիի վարչական տարածքում ցեմենտի գործարանի կառուցում։
Կարմիր սարում կան Կարմիր գրքում գրանցված բույսեր և կենդանիներ, որոնց առկայության դեպքում արգելվում է հանքարդյունաբերության իրականացումը։
Արարատի մարզի Կարմիր սարին հարող և իրենց բարձրարժեք գյուղատնտեսությամբ հատնի մի քանի գյուղերին՝ Այգեզարդ, Քաղցրաշեն, Գինեվետ, Նոր ուղի, սպառնում է տնտեսական ուղղվածության փոփոխություն, ինչպես նաև էկոլոգիական և սոցիալական խորը ճգնաժամ։
Կարդացեք նաև
Արփինե Խաչատրյանը նշեց, որ բնակավայրի բնակչությունը տեղյակ չի եղել հանրային լսումների մասին, հանրային լսումերին պատշաճ կերպով չեն մասնակցել․ «Այգեզարդի վարչական տարածքում հանքաարդյունաբերության հայտ էր ներկայացրել «ԴԻԳԸՆԴԻԳ» ՍՊԸ-ն, որի դեպքում ևս իրազեկումը ոչ պատշաճ կերպով է տեղի ունեցել։ Երրորդ լսման օրը երկու ժամ առաջ ենք իմացել հանրային լսման մասին, և հապճեպ եմ մասնակցել։ Դրանից հետո սկսել ենք մեր պայքարի գործողությունները։ Համայնքում փաստացի բնակվող բնակիչների 98 տոկոսից ավելին դեմ է․ 2300 ստորագրություն ենք հավաքել։ Բացարձակ մեծամասնությունը դեմ է հանքարդյունաբերության գործընթացին։ Նյութերն ուսումնասիրելիս պատահաբար Շրջակա միջավայրի նախարարության կայքում բացահայտել եմ, որ այդ սարում ևս մի քանի կազմակերպության՝ այդ թվում «ՕՐԴ ԳՐՈՒՊ» ՍՊԸ-ի՝ այդտեղ լինելու հանգամանքը։ Մեր համայնքի բնակիչները տեղեկացված չեն եղել «ՕՐԴ ԳՐՈՒՊ» ՍՊԸ-ի հանրային լսումների մասին, մենք չենք մասնակցել»։
Նշենք, որ Այգեզարդ գյուղի բնակիչները հանրագիր են ներկայացրել 2300 ստորագրությամբ՝ Կարմիր սարում հանքարդյունահանման դեմ։
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
