Այսօր «ՀՀ-Արևելյան գործընկերություն-ԵՄ. մարտահրավերներ և հնարավորություններ» թեմայով համաժողովի ժամանակ «Հանուն հավասար իրավունքների» կենտրոնի նախագահ Գայանե Աբրահամյանը, խոսելով կոռուպցիայի մասին՝ ասաց. «Մեկ շաբաթ առաջ Լիտվայում հնարավորություն ունեցա հանդիպելու ԱՄՆ Պետդեպարտամենտի փողերի լվացման եւ կոռուպցիայի դեմ պայքարի վարչության պետի հետ, որը նաեւ զբաղվում էր Հայաստանում կոռուպցիոն գործերի, ակտիվների վերադարձով, մի դիտարկում արեց, ասաց՝ ես ապշում եմ հաճախ, թե նախկին իշխանությունները ինչպիսի գերպրոֆեսիոնալիզմով են իրականացրել բոլոր կոռուպցիոն գործարքները, որ մեզ համար շատ դժվար է դրանք որպես կոռուպցիոն գործարքներ ապացուցել, չնայած ակնհայտ է, որ կոռուպցիա են, բայց իրավական տեսանկյունից անխոցելի են»:
Նա նշեց, որ մենք չունենք լուրջ ռեսուրսներ, մեր հիմնական ռեսուրսը մարդն է, մարդու լիարժեք կենսագործունեությունը հնարավոր է մարդու իրավունքների պաշտպանության եւ ժողովրդավարական ինստիտուտներով բացառապես, այլ պարագայում ունենալու ենք արտագաղթ:
Նա ասաց, որ քաղաքական կամքի խնդիր չի տեսնում, բայց ամեն դեպքում՝ Հայաստան-ԵՄ համապարփակ և ընդլայնված գործընկերության համաձայնագրի՝ CEPA-ի աշխատանքները թերի են իրականացվում:
Կարդացեք նաև
Հռիփսիմե ՋԵԲԵՋՅԱՆ
