Այն, ինչը կարող է տալ Հայաստանը Եվրոպային, դա քաղաքակրթական արժեքն է․ այսօր այս մասին հայտարարեց «Հանրապետություն» կուսակցության նախագահ Արամ Սարգսյանը՝ «ՀՀ-Արևելյան գործընկերություն-ԵՄ. մարտահրավերներ և հնարավորություններ» թեմայով համաժողովի ժամանակ։
Իր քաղաքակրթական կողմնորոշումը, ըստ Արամ Սարգսյանի, Հայաստանն ապացուցել է 2018-ի հեղափոխությամբ, ինչի արդյունքում, ըստ բանախոսի, բարձրացել է ԵՄ-ի հետ ՀՀ-ի շփումը։ Հայաստանի եվրաինտեգրման հիմնական արդյունք Արամ Սարգսյանը համարում է Հայաստանում եվրոպական քաղաքացիական դիտորդական առաքելության ներկայությունը, Ֆրանսիայից սպառազինություն գնելը։
Նաեւ ասում է՝ դիվերսիֆիկացնել մեր երկրի արտաքին քաղաքականությունը՝ մնալով ԱՊՀ-ում, ԵԱՏՄ-ում, ՀԱՊԿ-ում, բավական բարդ է։ Տնտեսական դիվերսիֆիկացիան էլ հեշտ չէ, քանի որ Հայաստանի հիմնական տնտեսական եւ արդյունաբերական հզորությունների 90 տոկոսը, որոնք մեր հիմնական աշխատատեղերն են, ԵԱՏՄ-ի ձեռքում են։ Էներգետիկ համակարգերի մասին անգամ չի էլ խոսում, քանի որ դրանք առհասարակ տրված են կառավարման ռուսական կողմին։
Արամ Սարգսյանը՝ հակադարձելով Արման Եղոյանին, ասում է, որ Եվրոպային տեխնիկական ինտեգրման առումով լրացուցիչ քայլեր են պետք, որն իշխանությունը պետք է անի։ Նա օրինակ է բերում Ադրբեջանին, որը ոչ ԵԱՏՄ-ում է, որ ՀԱՊԿ-ում, ոչ ԵՄ-ում, բայց կարողանում է իր տնտեսական համագործակցությունները զարգացնել։
Կարդացեք նաև
Ըստ Արամ Սարգսյանի, եվրաինտեգրումը իրական գործնական քայլեր է ակնկալում, ինչը, իբրեւ ժողովուրդ, ցույց չենք տվել։
Մանրամասները՝ տեսանյութում
Նելլի ԳՐԻԳՈՐՅԱՆ
