Հայաստանում նոր ատոմակայանի կառուցման հարցը մտել է շատ առարկայական փուլ. Այսօր այս մասին հայտարարեց ԱԽ քարտուղար Արմեն Գրիգորյանը՝ «ՀՀ-Արևելյան գործընկերություն-ԵՄ. մարտահրավերներ և հնարավորություններ» թեմայով համաժողովի ժամանակ։
«Հիմա ԱՄՆ-ի հետ քննարկում ենք իրավապայմանագրային դաշտը կարգավորելու հարցը, առանց դրա չենք կարող առաջ ընթանալ։ Այս պահին կարող ենք ասել, որ գնդակը ԱՄՆ դաշտում է»,-ասաց Արմեն Գրիգորյանը՝ հավելելով, որ ԱՄՆ-ում ներհամակարգային գործընթացներն անցնելուց հետո կսկսեն աշխատել։
«Հույս ունենք, որ առաջընթաց կունենանք»,-ասաց Արմեն Գրիգորյանը՝ հավելելով, որ նաեւ շատ հարցեր, որոնք կարճաժամկետ լուծում են պահանջում։
Արման Եղոյանը՝ ձախից եւ Հովսեփ Խուրշուդյանը՝ աջից
Հայաստանի էներգետիկ անկախության մասին խոսեց նաեւ ԱԺ եվրոպական ինտեգրման հանձնաժողովի նախագահ Արման Եղոյանը։
Կարդացեք նաև
Պատասխանելով դիվերսիֆիկացիա-եվրաինտեգրում հասկացությունների կապակցվածության, դրանց խոչընդոտների մասին հարցին, Արման Եղոյանը նախ ասաց՝ տպավորություն ունի, որ Հայաստանում եվրաինտեգրում եւ ԵՄ-ին անդամակցություն հասկացությունները նույնականացվում են, այնինչ, ԵՄ-ին անդամակցությունը եվրաինտեգրման գործընթացի փուլերից մեկն է։
Նա ընդգծեց նաեւ՝ ԱԺ-ում իր գլխավորած հանձնաժողովը կազմավորվել է 2007-ին, ինչը խոսում է այն մասին, որ ՀՀ-ի եվրաինտեգրումն ավելի վաղ է սկսվել։ Խնդիրը քաղաքական եւ տեխնիկական եվրաինտեգրման մեջ է ու իր կարծիքով, քաղաքական երկխոսությունը եվրաինտեգրման առումով ավելի առաջ է, քան դրա տեխնիկական սպասարկումները, ինչի համար կան եւ օբյեկտիվ եւ սուբյեկտիվ պատճառներ, բայց ի վերջո, գալու է մի կետ, որ տեխնիկական ինտեգրման դանդաղումը խոչընդոտելու է քաղաքական ինտեգրմանը, ինչը չի կարելի թույլ տալ։
Այս համատեքստում նաեւ նա համարում է, որ առաջնային պետք է լինի Հայաստանի՝ բնական գազից կախվածության նվազեցումը ու այս առումով, ապրիլի 5-ի հանդիպումը մեծ առաջընթաց է համարում, քանի որ Եվրահանձնաժողովի ղեկավարը հայտարարեց՝ պատրաստ են աջակցել Հայաստանի ատոմային էներգետիկայի զարգացմանը։ Սա, իր բնութագրմամբ, նշանակում է էներգետիկ անկախություն եւ եվրաինտեգրում։
Ըստ Արման Եղոյանի, եվրաինտեգրումը ոչ թե այն է, երբ դու ես գնում Եվրոպա, այլ այն, որ Եվրոպան է գալիս տարածաշրջան։
Մանրամասները՝ տեսանյութում
Նելլի ԳՐԻԳՈՐՅԱՆ
