Փաստաբան Սերգեյ Հարությունյանը «Հայելի» ակումբում անդրադառնալով Հայաստանում ժողովրդավարության աճելու մասին ԱՄՆ դեսպանի արած հայտարարությանը՝ ասաց, որ ոստիկանական գրեթե բոլոր բռնաճնշումներին ներկա է եղել եւ որպես փաստաբան փորձել է մարդկանց խախտված իրավունքները վերականգնել:
«Այն, ինչ ներկայումս կատարվում է Հայաստանում հատկապես դեսպանների եւ միջազգային կառույցների պարագայում, միանշանակ կարող ենք փաստել ու ձեւակերպել, որ դա ակնառու երկակի ստանդարտների ցայտուն դրսեւորում է: Երկակի ստանդարտներ այն առումով, որ Վրաստանում ընդդիմությունը ընդդիմություն է, խոցելի է, հետեւաբար, պաշտպանված է արեւմուտքի կողմից, որովհետեւ իրենցն է, իսկ այստեղ, որ ընդդիմությունը անկեղծ է, սեփական երկրի, սեփական ժողովրդի համար է պայքարում, ստացվում է, որ ընդդիմադիր գործիչների կամ անձանց արածները ապօրինի են:
Երկակի ստանդարտների դրսեւորումը երկու խնդիր է լուծում: Առաջինը, որ ներկայիս վարչախմբին ամենաթողություն է տալիս: Այսինքն, ամեն ինչ կարող եք անել եւ պատասխանատվության չէք ենթարկվի: Միայն արեք այն ամենը, ինչ մենք ենք ցանկանում: Իսկ դա ցավալի լուծումն էր Արցախի համար, ինչը արվեց: Եվ երկրորդ նպատակը որպես դրա շարունակություն այն է, որ տարածաշրջանից դուրս բերվի ռուսական ազդեցությունը, ամեն բան արվի, որ Հայաստանը դուրս գա ՀԱՊԿ-ից ու այս տարածքի բաժանումը տեղի ունենա գործընկեր երկրների մեջ:
Այդ ամենաթողությունը նաեւ գին ունի: Եթե հանկարծ այս վարչախումբը մի պահի ինչ-որ մի չափով չենթարկվի իրենց, ապա Հայաստանի հետ կապված բազմաթիվ զեկույցներ կստեղծվեն: Այսինքն, դա մահակ է: Ասում են՝ այսօր աչք ենք փակում, բայց եթե մի պահ դուք այնքան էլ մեր ուզածով չգնաք, ձեր հետ այլ կերպ կվարվենք:
Կարդացեք նաև
Սրբազան շարժման հետ կապված: Հավատացեք, հենց այն հանգամանքը, որ արտաքին այսպիսի արձագանքներ կան, դա ցույց է տալիս, որ շարժումը ճիշտ ուղղությամբ է ընթանում եւ սլաքները ճիշտ ուղղությամբ են դրվում: Սուրբ Աննա եկեղեցում հավաքվող մարդկանց նպատակը ոչ թե ինչ-որ երկրների կամ միջազգային կառույցների հաճոյանալն է, այլ արժանապատիվ ապրելը:
Այն ամենը, ինչ մենք այսօր բարձրաձայնում ենք, մեզնից ավելի լավ քաջատեղյակ են հենց այդ դեսպանատները: Առավել եւս, որ ամեն ինչը կատարվում է իրենց աչքի առաջ: Պարզապես, այս շարժումը, որն առաջնորում է Բագրատ սրբազանը, իրենց հաճո չէ եւ իրենք մտածում են, որ իրենց նպատակները չեն կարողանում ի կատար ածել: Ու ճիշտ են մտածում: Եվ մեր ժողովուրդը պետք է գիտակցի, որ սրբազան պայքարը բերելու է իր երեխայի ապագայի ուժեղացման»,-ասաց փաստաբանը:
Աշոտ ՀԱԿՈԲՅԱՆ
