2023 թվականին Ազատ գյուղի զինվորական կացարանի հրդեհի գործով դատական հերթական նիստում երեկ շարունակվեց 15 զինծառայողների ծնողների հարցաքննությունը:
«Կացարանը գյուղի հին տուն էր, ըստ երեւույթին, երեւի ադրբեջանցիների սարքած: Փոքր սենյակ էր, որտեղ տղերքն էին մնում, 22 հոգին 27 քառակուսու մեջ էր մնում: Մուտքի սկզբում վառարանն էր, մուտքի դռան դիմացից զինանոցն էր, աջ՝ ննջարանը: Տպավորությունն այնպես էր, որ ամեն ինչ կենտրոնացած է հակահրդեհային միջոցներ չլինելու վրա: Իսկ ով է ասում, որ հակահրդեհային միջոցներ լինեին, էդ դեպքը չէր լինելու, կամ 15 զոհը չէր լինելու»,- հարցաքննության ժամանակ ասաց զոհված զինծառայողներից մեկի հայրը:
Այդ կացարան ինչի հիման վրա են այդ ստորաբաժանումը բերել, դրա համա՞ր էր նախատեսված. այսպիսի հարց հնչեց հարցաքննվող ծնողին, ինչին ի պատասխան՝ նա ասաց. «Հիմա էլ դաշտում զինվորներ կան, թող մեծ-մեծ չխոսեն էդ ղեկավարները,ՊՆ նախարարը: Հիմա էլ կան «դոմիկներում», վրաններում, հիմա էլ անվտանգությունն ապահովված չէ: Այդ հարցը առաջացել է, թե ինչու են մեր երեխեքին էդ փոքր կացարանում պահել, ոչ մի գործողություն, ցավոք, չենք ձեռնարկել»:
Կարդացեք նաև
Հիշեցնենք, որ 2023 թվականի հունվարի 19-ին, ժամը 01:30-ի սահմաններում Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում բռնկված հրդեհի հետեւանքով զոհվել է 15 ժամկետային զինծառայող, 7 զինծառայող տեղափոխվել է Վարդենիսի հոսպիտալ, նրանից չորսը բուժօգնություն ստանալուց հետո դուրս է գրվել, 3–ը՝ ծանր վնասվածքներով տեղափոխվել Երեւան՝ Այրվածքաբանության ազգային կենտրոն:
Դեպքից անմիջապես հետո պաշտոններից ազատվել են 2-րդ բանակային կորպուսի հրամանատարը եւ եւս 7 բարձրաստիճան զինվորականներ։ Դեպքի առնչությամբ նախաձեռնվել է քրեական վարույթ՝ ՀՀ ՔՕ 532-րդ հոդվածի 4-րդ մասով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու եւ ավելի անձի մահ) եւ վարույթ՝ ՔՕ 550-րդ հոդվածի 3-րդ մասով (զինվորական պաշտոնեական անփութության հատկանիշներով, որն անզգուշությամբ առաջացրել է մարդու մահ), որը կցվել է մայր վարույթին։
Արփինե ՍԻՄՈՆՅԱՆ
