«Շուռնուխում պատշգամբից երեւում էին ադրբեջանական դրոշները, խայտառակ մի պատկեր: Մարդիկ չեն կարողանում զբաղվել անասնապահությամբ, գյուղատնտեսությամբ, որովհետեւ ամբողջ արոտավայրերը անցել են թշնամու վերահսկողության տակ, ջրային ակունքները անցել են թշնամու վերահսկողության տակ: Ուղիղ նշանառության տակ են մանկապարտեզները, դպրոցները գյուղապետարանի շենքը, գյուղ մտնող ճանապարհները: Ներքին Հանդում անգամ գերեզմանն են տվել թշնամուն: Հայի գերեզմանը էս մարդիկ տվել են թշնամուն: Մարդը ստիպված է իր վիշտը, իր մեռելը տանի թաղի Կապանում: Այդքան վշտի պրոբլեմների մեջ՝ մարդիկ մի հատ էլ պիտի մտածեն հանգուցյալին որտեղ հուղարկավորեն: Խայտառակ մի պատկեր»,- այսօր «Հայելի» ակումբում «Հայաստան» խմբակցության պատգամավոր, «Տավուշը հանուն հայրենիքի» շարժման անդամ Գառնիկ Դանիելյանն այսպես ներկայացրեց, թե ինչ է կատարվում Սյունիքի համայնքներում:
Գառնիկ Դանիելյանն ասաց, որ Ներքին Հանդից ներքեւ Ալիեւն ու Մեհրիբանն են գալիս, Սոսիների հայտնի այգում լողանում. «Իրենց տեսանյութերում կան, բերել են թշնամուն, նստեցրել Սյունիքում քիչ չի, հետն էլ գլուխ են գովում, որ խաղաղության դարաշրջան, խաղաղության խաչմերուկ: Մարդիկ ամեն վայրկյան սպասում են, որ ադրբեջանցին կարող է մտնի գյուղեր, ոնց որ մտավ, պահնորդին սպանեց, ասացին՝ մոլորված է, փառք ու պատվով հանձնեցին Ադրբեջանին: Կապանի օդանավակայանի վերեւը ադրբեջանական դրոշ է, ո՞նց պիտի սպասարկի էդ օդանավակայանը, սուվերենությունից են խոսում: Անգամ սեփական տարածքում չեն կարող ինքնաթիռով վայրէջք կատարել օդանավակայան՝ առանց Ադրբեջանի թույլտվության, չեն կարող գործարան կառուցել: Այն, ինչ անվտանգային առումով տեսանք, խայտառակ իրավիճակ էր: Ու այսքանից հետո փորձում են յուրայինների միջոցով պատկեր ստանալ, թե մարդիկ ինչքան գոհ են: Անբարոյականության գագաթնակետն է, երբ մարդիկ են բերում, նստեցնում գյուղի մեջը ու սեփական ժողովրդին կերակրում, թե մարդիկ ինչքան երջանիկ են՝ ադրբեջանցիներին տեսնելով, իր սեփական հողն ու տունը Ադրբեջանին տալով»:
Նա ասաց, թե ինչ է պատմել Շուռնուխի բնակիչ տիկին Անահիտը: Նրա թոռնիկը աղեկտուր լաց է լինում ու ուզում է խաղալ թշնամու վերահսկողության տակ անցած իր տան տարածքում. «Պատկերացնու՞մ եք ինչ հոգեբանական ապրումներ են ունենում»:
Կարդացեք նաև
Հռիփսիմե ՋԵԲԵՋՅԱՆ
