Այսօր ժողովրդավարության հայկական երրորդ ֆորումին «Ինչո՞ւ ԼՂ-ում հայեր չկան» թեմայով պանելային քննարկման ժամանակ «Միջազգային համագործակցություն հանուն մարդու իրավունքների» կազմակերպության տնօրեն Բրիջիթ Դյուֆուրը խոսեց Արցախում մարդկության դեմ հանցագործությունների, Ադրբեջանում հայերի նկատմամբ ատելության մասին եւ ասաց. «Ադրբեջանում սարսափել ու զզվել եմ այն լեզվից և կատակներից,որ կիրառում են հայերի մասին»:
Միջազգային եւ անվտանգության հարցերի հայկական ինստիտուտի (ՄԱՀՀԻ) հիմնադիր Ստյոպա Սաֆարյանը բանախոսներին ասաց. «Զեկույցում թերեւս ամբողջ պատկերը չի բացվում, թե ինչու ԼՂ-ում հայեր չկան: Իրականում խնդիր էր դրված, որ 150-160 հազար մարդու զրկեն ինքնորոշման իրավունքի կրողը լինելուց եւ տարան նրան, որ Ալիեւը որոշի՝ ով է ընդունում շատ ավելի բարձր ժողովրդավարական արժեքներ ունեցող Արցախի բռնագաղթյալ քաղաքացի լինելու եւ Ադրբեջանի շատ ավելի ցածր եւ ավտորիտար ռեժիմի քաղաքացի լինելու միջեւ:
Բայց Ադրբեջանն ընդամենը գործիք էր, ես ուզում եմ խոսել գլոբալ կառավարման եւ գլոբալ պատասխանատվության խնդրից, որը զեկույցում չեմ նկատում: ՄԱԿ-ի Անվտանգության խորհրդի 2 նիստ է եղել 44-օրյա պատերազմի ընթացքում եւ ոչ մի բանաձեւ չի ընդունվել: ՄԱԿ-ը չի կանգնեցրել 44-օրյա պատերազմը: Պատերազմը կանգնեցվել է Ռուսաստանի կողմից: Մենք մեր հայրենակիցներին շատ դեպքերում Արցախում հանդիմանում ենք, թե ինչու են ռուսական կողմնորոշմամբ, բայց պատկերացրեք, թե ինչ են զգում, երբ տեսնում են, որ մի ամբողջ մոլորակ կառավարող կազմակերպություն չի կարողանում կանգնացնել եւ Ռուսաստանն է կանգնացնում, ո՞վ է ուժեղ, ո՞ւմ պիտի հավատա ինքը»:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
