Սարաեւոյում ավարտվեց բռնցքամարտի Եվրոպայի պատանեկան առաջնությունը, որտեղ այսօր կայացած եզրափակիչ մենամարտերում 75 կգ քաշային Սամվել Սիրամարգյանը երրորդ ոսկե մեդալը նվաճեց Հայաստանի համար։ Մեր բռնցքամարտիկը պարտության մատնեց Ռուսաստանի ներկայացուցիչ Արսենի Ստոլնիկովին։
Հայաստանի տղաների եւ աղջիկների հավաքականներն ընդհանուր առմամբ ունեին եզրափակիչների ինը մասնակից։ Նրանցից երեքը իրենց տարիքային խմբում դարձան լավագույնը Եվրոպայում, իսկ վեցը արժանացան արծաթե պարգեւի։
Հաղթողի կոչումը նվաճեցին 48 կգ քաշային Սիմոն Սիմոնյանը, 75 կգ՝ Սամվել Սիրամարգյանը եւ 48 կգ՝ Համեստ Աֆրիկյանը, իսկ փոխչեմպիոն դարձան․ Սյուզան Իշխանյանը (48 կգ), Ալեքս Պետրոսյանը (63 կգ), Առնո Դարչինյանը (50 կգ), Տիգրան Հովսեփյանը (54 կգ), Մարտին Սահակյանը (60 կգ) եւ Արտյոմ Ստեփանյանը (66 կգ)։
Աշոտ ՀԱԿՈԲՅԱՆ
