«Մի՞թե հայրենիքը պաշտպանելը վատ բան է, արատավոր երեւույթ: Իհարկե, ոչ: Դա նրանց հերթական բարբաջանքն ու հերթական սխալ մոտեցումը եկեղեցու ու նրա հավատավոր զավակների հանդեպ»,- այսօր մեզ հետ զրույցում ասաց Տաթեւի վանահայր Սահակ վարդապետ Շաքարյանը՝ պատասխանելով քննադատություններին, որ եկեղեցին չպիտի խառնվի քաղաքականությանը:
Նա ասաց, որ առաջին իսկ օրվանից եղել է «Տավուշը հանուն հայրենիքի» շարժման մեջ, Բագրատ սրբազանի համար աղոթում են. «Իշխանությունների ոչ մի ասածի հետ համամիտ չենք, մենք պիտի մեր գործը անենք, աղոթենք ու աշխատենք, հայրենիքի տեսիլքով ապրենք, ոչ թե թիզ առ թիզ հանձնելով, գավառ առ գավառ տալով՝ խաղաղության մասին խոսենք, ինձ համար դա անհեթեթություն է»:
Նա ասաց, որ չարիքը պետք է արմատախիլ արվի եւ հեռացվի, ու երկիրը լքելու մասին պետք է մոռանալ, սա մեր աստվածապաշտպան երկիրն է:
Կարդացեք նաև
Հարցին՝ Փաշինյանը սաղմոսներից է մեջբերումներ անում, Հարության տոնը շնորհավորեց «Անմեղ մարդու» աղոթքով, ձեւ է տալի՞ս, թե մոտ է Աստծուն՝ Սահակ վարդապետը պատասխանեց. «Աստվածաշնչից ասենք՝ մարդու մասին դատում են ըստ իր գործերի: Մնացյալը ինչ է ասում, ինչ բանաստեղծություններ է ասում՝ էական չի»:
Հռիփսիմե ՋԵԲԵՋՅԱՆ
