Այսօր «Տավուշը հանուն հայրենիքի» շարժման անդամները Շուռնուխում էին: Բագրատ սրբազանին հյուրընկալեց շուռնուխցի տիկին Անահիտը:
Անահիտի տունը հակառակորդի վերահսկողության տակ է մնացել: Նա վրդովվեց. «Մինչեւ ե՞րբ պետք է հանձնի, ես չեմ հասկանում, Արցախը՝ մեր հարուստ երկիրը հանձնեց, հիմա Սյունի՞քն է հանձնում։ Ինքը կանգնել է, ասում է՝ ինչ ուզի Ալիեւը, ես տալու եմ: Ես էս 6 տարվա մեջ մի անգամ չեմ լսել, որ ասի՝ իմ երկիրը, ուրեմն ինքը հայ չի: Ի՞նչ անենք, որ պրծնենք էս ցավից»: Բագրատ սրբազանն ասաց, որ պետք է այս չարիքը հեռացվի:
«Դե ուրեմն եկեք կազմակերպենք ու հեռացնենք»,- ասաց տիկին Անահիտը ու հավելեց. «Իրանք եթե դուրս գան, իրանց աթոռների հետ են դուրս գալու, աթոռներն էլ վարակված կլինեն: Արցախում հարստությունը, ամեն ինչը թողել, տկլոր դուրս են եկել, էնքան մահեր ենք ունեցել, լրիվ երիտասարդներ»,- ասաց նա ու սկսեց հեկեկալ:
Հուզվեց նաեւ Բագրատ սրբազանը:
Կարդացեք նաև
Տիկին Անահիտը Փաշինյանին մեղադրեց, որ Ալիեւի մոտ կուռկուռի ձագ է դարձել, մինչդեռ նախկինում նա էր մերոնց մոտ կուռկուռի ձագ դառնում:
Փաշինյանը տեսանյութ էր հրապարակել Շուռնուխից ու ցույց էր տալիս, որ գոհ են: Շուռնուխցիները այսպես էին մեկնաբանում. «Մի քանի տուն տվեց ու աչքակապություն արեց: Իսկ բնակարանների բանալիները տալուց ասում էին, որ Փաշինյանը շատ վախեցած է եղել. «Վախեցավ, իրան քցեց տան մեջ»:
Զրույցի մանրամասները՝ տեսանյութերում:
Հռիփսիմե ՋԵԲԵՋՅԱՆ
