«Ասում են՝ դասալիք եք, որ կարևոր պահին պաշտոնը թողել եք, ու սա ասում են մարդիկ, ովքեր մեջքից հարվածել են հայ ժողովրդին: 90-ականներից սկսած՝ մենք երբեք չենք ունեցել այսքան թույլ, այսքան տկար ու անողնաշար դիվանագիտություն»,- այսօր Գորիսում «Տավուշը հանուն հայրենիքի շարժման» հավաքի ժամանակ ասաց ՀՀ ԱԳՆ նախկին գլխավոր քարտուղար Վահագն Մելիքյանը:
Նա նշեց, որ հիվանդագին կեցվածք կա նախկինների նկատմամբ, ու դա ուզում են ծախել մարդկանց. «Ի՞նչ ունեինք նախկինների ժամանակ: Երեկ Բռնակոթում մի տղա իմ ձեռքից բռնեց, բարձրացրեց վերև, ես հեռադիտակով Իշխանասարն եմ տեսել»։ Մելիքյանն ասաց, որ Փաշինյանը ժողովրդի վախն է բռնել, թե պատերազմ կլինի, բայց նույնիսկ այս վիճակում, երբ թվում է, թե անդառնալի է, լավ դիվանագիտության շնորհիվ կարող ենք ունենալ հաջողություն:
Կարդացեք նաև
Վահագն Մելիքյանն ասաց, որ այն, ինչ եղավ Տավուշում ու դոմինոյի էֆեկտով պիտի հասնի Սյունիք, դրա մասին խոսում էին 2,5 տարի առաջ. «Մենք ունենք 2 ընդգծված թշնամի, հակառակորդի ախորժակը ինչքան էլ Տավուշից սկսի, Սյունիքն է, ուզում եմ դա լավ գիտակցեք: Սյունիքը շատ մեծ ծրագրի մի հատվածն է, ինչի համար հարյուրավոր տարիներ պայքարել են, չեն կարողացել հասնել: Հիմա հրաշալի նվեր ունեն իրենց ձեռքին Փաշինյան անունով: Մենք երկու ոտքից մեկը՝ Արցախը կորցրել ենք, մյուս ոտքը Սյունիքն է»:
Հռիփսիմե ՋԵԲԵՋՅԱՆ
