«Վարչապետն առաջարկել է այս պաշտոնում, ես համաձայնել եմ, այս պատասխանատվությունը վերցրել եմ, որ համար շնորհակալ եմ»,- կառավարության այսօրվա նիստից հետո լրագրողների հետ ճեպազրույցում ասաց Նիկոլ Փաշինյանի նորանշանակ խորհրդական, Լոռու նախկին մարզպետ Արամ Խաչատրյանը։
Հարցին, թե որ ոլորտներում կարող է խորհուրդներ տալ Նիկոլ Փաշինյանին, նա պատասխանեց․ «Երբ մենք վարչապետի հետ կքննարկենք, թե ինչ ոլորտն եմ ես համակարգելու, հենց այդ ոլորտի շրջանակներում էլ մենք կաշխատենք։ Ես զինվորական եմ, նաեւ աշխատել եմ մարզպետ։ Այդ երկու ոլորտում կարող եմ տալ խորհուրդներ»։
Հարցին, թե հնարավո՞ր է Նիկոլ Փաշինյանին խորհուրդ տա, որ մեր կորցրած տարածքները պետք է վերադարձնել, Արամ Խաչատրյանը պատասխանեց․ «ՀՀ տարածքը 29 743 քկմ է, եւ դա չի էլ քննարկվում»։
Հայաստանից բռնազավթած տարածքներին անդրադառնալով՝ նա ասաց․ «Դրա մասին վարչապետը բազմիցս խոսել է, այդ տարածքները պետք է վերադառնան Հայաստանին, դիվանագիտական ճանապարհով»։
Կարդացեք նաև
Արամ Խաչատրյանը հավելեց․ «Հիմա մեր օրակարգում խաղաղության պայմանագիրն է, եւ մենք չպիտի շեղվենք խաղաղության պայմանագրից։ Ես վստահ եմ, որ Ադրբեջանը կարձագանքի»։
Լրագրողները նաեւ հարցրին Արամ Խաչատրյանին՝ ի վերջո ո՞վ հանձնեց Արցախը։ «Արցախի գործող իշխանությունները»,- պատասխանեց նա։
Հարցին, թե Նիկոլ Փաշինյանի հայտարարություններն իր մոտ մտահոգություն չեն առաջացնո՞ւմ, երբ պատերազմով վախեցնում է հայ ժողովրդին, նա պատասխանեց՝ «Ոչ»։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
