Կառավարությունն այսօրվա նիստում ընդունեց որոշում, որով նախատեսվում է պետական բյուջեից լրացուցիչ միջոցներ հատկացնել 2024 թվականի հուլիսի 1-ից Հանրային պաշտպանի գրասենյակին լրացուցիչ 15 հաստիք ավելացնելու նպատակով։
Նիկոլ Փաշինյանն ասաց․ «Սա այն որոշումներից է, որն ի ցույց է դնում արդար դատաքննության իրավունքին քաղաքացիների հասանելիությունն ապահովելու կառավարության կամքը։ Եվ մենք սա դիտում ենք արդարադատության ոլորտի բարեփոխումների եւ դատական համակարգի բարեփոխումների համատեքստում։ Ուզում եմ գոհունակությամբ ընդգծել, որ երեկ ԵԽԽՎ-ն Հայաստանի ստանձնած պարտավորությունների կատարմանը վերաբերող իր բանաձեւում բարձր է գնահատել նաեւ դատական համակարգի անկախության պահպանմանն ուղղված բարեփոխումները, որոնք իրականացնում է ՀՀ կառավարությունը։ Իհարկե, նշել է մի շարք մարտահրավերների մասին, այդ խնդիրների մասին մենք նույնպես գիտենք։ Եվ մեր կամքն է, որպեսզի հետեւողական եւ անհոգնել գնանք ՀՀ դատական համակարգն իրական անկախությամբ ապահովելու ճանապարհով»։
Ըստ նրա՝ դատական համակարգի հետ կապված մարտահրավերը 2018 թվականից եղել է եւ շարունակում է մնալ նույնը։ «Մենք պետք է կենտրոնացած մնանք այդ մարտահրավերի վրա։ Որո՞նք են այդ մարտահրավերները, մենք ասում ենք, որ մեր խնդիրն է, որ դատական համակարգը կախվածություն չունենա, բայց կախվածություն չունենա ոչ միայն կառավարությունից, այլեւ կախվածություն չունենա հնարավոր այլ տեղերից, որից սովորաբար ունենում են կախվածություն կամ ավանդաբար ունեցել են կախվածություն։ Եվ այս առումով դատական համակարգում նույնպես հակակոռուպցիոն քաղաքականության ակտիվ իրագործումը չափազանց կարեւոր է մեզ համար»,- ասաց Փաշինյանը։
Մանրամասները՝ տեսանյութում
Կարդացեք նաև
Ռոզա ՀՈՎՀԱՆՆԻՍՅԱՆ
