Այսօր Հայաստանի կիրառական քաղաքականության հետազոտական ինստիտուտի (ԱՊՐԻ Արմենիա) անկախ վերլուծական կենտրոնի ԱՊՐԻ ֆորում 2024-ին էր մասնակցում Անվտանգության խորհրդի քարտուղար Արմեն Գրիգորյանը:
Լրագրողները նրան հարցրեցին՝ դուք խոսում եք խաղաղությունից, բայց Արցախի ռազմաքաղաքական ղեկավարությունը գերի է Բաքվում, նրանց մասով որեւէ քննարկում, բանակցություն ծավալո՞ւմ եք, որ վերադարձնեք: Արմեն Գրիգորյանը պատասխանեց. «Միանշանակ, բոլոր գերիների վերադարձը միշտ քննարկում ենք, դա եղել է միշտ մեր օրակարգում: Անցած տարի ունեցել ենք որոշակի հաջողություններ, 32 գերի վերադարձվել են, բայց մենք դրանով չենք բավարարվել»:
Հարցին՝ խաղաղության համար դա գլխավոր նախապայման չէ՞՝ նա պատասխանեց. «Ես գտնում եմ, որ ճիշտ չի դա փոխկապակցել խաղաղության պայմանագրի հետ: Մեր կարծիքով, նրանք հնարավորինս շուտ պետք է վերադառնան Հայաստան՝ այսօր կամ վաղը»:
Կարդացեք նաև
Հարցին՝ կարո՞ղ ենք ունենալ Խաղաղության պայմանագիր՝ առանց ռազմաքաղաքական գերիներին վերադարձնելու՝ նա պատասխանեց. «Ինչպես ասացի, շատ կարեւոր է, որ մենք աշխատենք այն ուղղությամբ, որ հնարավորինս արագ վերադարձնենք: Խաղաղության հաստատումը նաեւ նշանակում է գերիների վերադարձ, մենք պետք է աշխատենք, որպեսզի խաղաղության հաստատումը համապարփակ լինի ու բոլոր ուղղությամբ»:
Հռիփսիմե ՋԵԲԵՋՅԱՆ
