Այսօր Հայաստանի կիրառական քաղաքականության հետազոտական ինստիտուտի (ԱՊՐԻ Արմենիա) անկախ վերլուծական կենտրոնի ԱՊՐԻ ֆորում 2024-ին էր մասնակցում Անվտանգության խորհրդի քարտուղար Արմեն Գրիգորյանը:
Լրագրողների հետ ճեպազրույցում հարցին՝ Ադրբեջանը տեղեկատվություն է տարածում, որը հետո հերքում է հայկական կողմը, բայց սա արդեն աշխատանքային ոճի է վերածվել, ինտենսիվացել են այդ հաղորդագրությունները, ինչը սպասում է ձեւավորում նոր էսկալացիայի, հայկական կողմը սպասո՞ւմ է էսկալացիայի՝ նա պատասխանեց. «Բնականաբար, Հայաստանին անհանգստացնում են նման հաղորդագրությունները, որովհետեւ միանշանակ հայկական կողմից քայլ չի եղել էսկալացիայի ուղղությամբ, այսինքն, կրակոցներ չեն եղել եւ մեզ անհանգստացնում է, որ այդպիսի կեղծ լուրեր են տարածում: Բայց նաեւ մենք Ադրբեջանին հրապարակային առաջարկել ենք, որ համատեղ պետական մեխանիզմ ստեղծենք գերատեսչությունների միջեւ, դա կարող է լինել քննչական կամ այլ մարմին, որոնք կհետաքննեն դեպքերը ու վերջնական եզրահանգման կգան ու միջազգային հանրությանը հասկանալի կլինի»:
Արմեն Գրիգորյանը խոսեց նաեւ Բրյուսելի արձագանքի մասին, որ Եվրամիության դիտորդները կարող են օգտակար լինել, բայց ԵՄ դիտորդները հետաքննելու մեխանիզմ չունեն, ըստ նրա, կարող են համատեղ մարմին ստեղծել:
Հարցին՝ կհամաձայնի՞ Ադրբեջանը ներդնել հետաքննության մեխանիզմները, որովհետեւ տարիներ շարունակ մենք դրա մասին խոսել ենք, բախում կա Ադրբեջանի հետ՝ Արմեն Գրիգորյանը պատասխանեց. «Բազմաթիվ բաներ տարիներ շարունակ չի եղել, բայց հնարավոր դարձավ որեւէ փուլում: Եթե Ադրբեջանը պնդումներ է անում, Հայաստանն ասում է՝ չի եղել, կարծում եմ, պետք է»: Առաջարկությունը հայկական կողմն արել է, սպասում է Ադրբեջանի արձագանքին:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
