«Հատկապես անցյալ տարի բոլորիս մտահոգել է Ադրբեջանից՝ Լեռնային Ղարաբաղի տարածքից հայերի արտաքսումը»,-hարցին՝ ինչպիսի՞ն է Ձեր և ՄԱԿ-ի մոտեցումը՝ Ադրբեջանում ապօրինաբար պահվող հայերի գերիների ազատ արձակման խնդրին անհապաղ լուծումներ գտնելու հարցում, այսպես պատասխանեց ՄԱԿ-ի մարդու իրավունքների հարցերով գերագույն հանձնակատար Ֆոլկեր Տյուրքը (լուսանկարում)։
Եվրոպայի խորհրդի խորհրդարանական վեհաժողովում (ԵԽԽՎ) հայկական պատվիրակության անդամ Արմեն Գևորգյանը ՄԱԿ-ի մարդու իրավունքների հարցերով գերագույն հանձնակատար Ֆոլկեր Տյուրքի հետ հարցուպատասխանի ժամանակ փաստեց՝ Հայաստանի և Ադրբեջանի միջև արդար և փոխընդունելի խաղաղ կարգավորում գտնելու հիմնական խոչընդոտներից մեկը շարունակում է մնալ Ադրբեջանում ապօրինի պահվող հայ գերիների և ռազմագերիների, այդ թվում՝ Լեռնային Ղարաբաղի ղեկավարների վերադարձի հարցը։ Հայ պատգամավորը հարցրեց՝ արդյոք տեղյա՞կ է այս խնդրի մասին։
ՄԱԿ-ի մարդու իրավունքների հարցերով գերագույն հանձնակատարը, այդպես էլ չպատասխանելով հայ գերիների վերաբերյալ հարցին, հիշեցրեց՝ ՄԱԿ-ը մի շարք առաքելություններ է ստանձնել մասնավորապես՝ դեպի Հայաստան ավելին իմանալու, թե ինչ է տեղի ունեցել Լեռնային Ղարաբաղի արտաքսված հայերի հետ և վստահեցրեց՝ թե՛ Ադրբեջանի, թե՛ Հայաստանի հետ իրենց երկխոսության մաս է կազմում այդ խնդիրներին լուծում գտնելը։
Այնուհետև նշեց․ «Վերադարձի իրավունք, իհարկե, կա։ Իրավունք կա ապահովելու, որ այդ անձանց գույքային իրավունքը հարգվի ու պաշտպանվի, և իսկապես կարևոր է, որ խաղաղության գործընթացը շարունակվի։ Խաղաղության գործընթացի մի մասը նաև հաշվետվողականության ու անցումային արդարադատության հարցերն են»։
Կարդացեք նաև
Տաթև ՀԱՐՈՒԹՅՈՒՆՅԱՆ
