Հունիսի 24-ին ՆԳ նախարարության կարգապահական հանձնաժողովի հերթական նիստի ժամանակ հանձնաժողովի որոշմամբ՝
ոստիկանության մեկ ծառայող ենթարկվեց կարգապահական պատասխանատվության՝ «Ոստիկանությունից ազատում» կարգապահական տույժի, եւս մեկի նկատմամբ կիրառվեց «Խիստ նկատողություն» կարգապահական տույժը:
Պաշտոնական հաղորդագրության մեջ տույժերի ենթարկված ոստիկանների կամ նրանց տույժերի ենթարկելու պատճառների մասին ոչ մի տեղեկություն չկա: Երբ փորձեցինք ճշտել ՝ ովքեր են կամ ինչի համար են տույժերի ենթարկվել, ՀՀ ոստիկանության հասարակայնության հետ կապի և լրատվության վարչության պետ Զարզանդ Գաբրիելյանն ասաց, որ եթե պետք լիներ, այդ տեղեկությունը կհրապարակեին: Իսկ եթե մեզ շատ է հետաքրքրում, կարող ենք գրավոր հարցում ուղարկել:
Պարոն Գաբրիելյանն ասաց նաեւ, որ չի կարող հայտնել, թե տույժերն արդյոք կապ ունեին «սրբազան շարժման» ժամանակ քաղաքացիների նկատմամբ բիրտ ուժ կիրառելու հետ:
ՆԳ նախարարի խոսնակ Նարեկ Սարգսյանը մեզ հետ զրույցում ասաց, որ նշված ոստիկանների տույժերը որեւէ կապ չունեն ցույցերի հետ, այլ տվյալներ նա չհայտնեց:
Կարդացեք նաև
Նինա Կարապետյանց
Իրավապաշտպան Նինա Կարապետյանցին չի զարմացնում փաստը, որ հունիսի 12-ին քաղաքացիների նկատմամբ բիրտ ուժ ու հատուկ միջոցներ կիրառած որեւէ ոստիկանի նկատմամբ դեռեւս չկա աշխատանքից ազատում կամ որեւէ այլ տույժ:
«Դեպքերի հետ կապված քննությունը դեռ ընթանում է, այն բավականին երկար ժամանակ կտեւի: Հետո կտեղեկացվեք, որ որոշ մարդկանց նկատմամբ գուցե ինչ-որ տեսակի գործողություններ՝ գուցեեւ նկատողություն, մինչեւ իսկ աշխատանքից հեռացում կարող է լինել: Բայց այդ բոլոր մարդիկ կարճ ժամանակ հետո հայտնվելու են ավելի բարձր պաշտոններում ու պրեմիաներով: Այդպես է եղել նախկինում, այդպես է լինելու վաղը, որովհետեւ այս համակարգում որեւէ բան չի փոխվել» ,- մեզ հետ զրույցում ասաց Նինա Կարապետյանցը:
Ինչ վերաբերում է հունիսի 24-ին տույժերի ենթարկված ոստիկանների տվյալները ու տույժերի ենթարկվելու պատճառները ՆԳՆ-ի կողմից չհրապարակելուն՝ Նինա Կարապետյանցը նկատեց. «Չեմ կարծում, որ օրինակ որեւէ ոստիկան, ուսադիր ունեցող պաշտոնյա, ավելի բարձր պաշտպանվածություն պետք է ունենա, քան դատավորները: Եթե դատավորների վերաբերյալ կարգապահական նիստերը հրապարակային են, նրանց վերաբերյալ կարգապահական որոշումները հրապարակային են` հետեւաբար ոստիկանների նկատմամբ կիրառված որոշումները եւս պետք է լինեն թափանցիկ: Մենք ոչ միայն վերջնական որոշումը տվյալ անձի նկատմամբ պետք է իմանանք, այլեւ տվյալ ոստիկանի անուն, ազգանուն ու թե ինչ հիմնավորումներով է նրանց նկատմամբ որոշումը կայացվել»:
Արփինե ՍԻՄՈՆՅԱՆ
