Վաղը՝ հունիսի 26-ին, Ադրբեջանում անցկացվելու է «Արևմտյան Ադրբեջանի» մինի ֆուտբոլի գավաթի խաղարկություն։
Քաղաքագետ Գագիկ Համբարյանն, անդրադառնալով ադրբեջանական լրատվամիջոցների հաղորդած այս տեղեկությանը, իր ֆեյսբուքյան էջում գրել է․ « Շատ «խաղաղ» ադրբեջանցիները պատրաստվում են մինի ֆուտբոլի Արևմտյան Ադրբեջանի գավաթին…
Դե, իսկ մենք էլ շատ հնազանդ ու խղճուկ ընդունում ենք Բաքվի՝ մեզ ստորացնելու բոլոր քայլերը, քանի որ Ալիևը մեզանից վրեժխնդիր է լինում ու քանի որ հայ ժողովրդի ինչ֊որ մի հատված հանդուրժում է Նիկոլ Անհողին…»։
Aravot.am -ի հետ զրույցում քաղաքագետը համոզմունք հայտնեց, որ այս քայլով Ադրբեջանը մեկ անգամ ևս ցույց է տալիս, որ ինքը չի հրաժարվում տարածքային պահանջներ ներկայացնել Հայաստանի Հանրապետությանը։
Կարդացեք նաև
«Ադրբեջանի իշխանությունները համարում են, որ ընդհանրապես Հայաստանի Հանրապետություն անունով երկիր գոյություն չունի և այդ երկրի ամբողջ տարածքը հերթական անգամ ներկայացնում են որպես Արևմտյան Ադրբեջան։
Ադրբեջանի այս լկտիությունը պայմանավորված է Հայաստանի գործող իշխանությունների թրքամետ արտաքին քաղաքականությամբ և Նիկոլ Փաշինյանի կողմից Ալիևի շանտաժ-պահանջները շատ արագ կատարելով։
Հիշեցնեմ, որ Ադրբեջանն ընդամենը երկու ամիս առաջ՝ ապրիլի վերջին, անցկացրեց համադպրոցական օլիմպիադիա․ 9-10-րդ դասարանի երեխաները շարադրություն էին գրում, թե ինչպես էին իրենք պատկերացնում վերադարձը դեպի Արևմտյան Ադրբեջան։ Նույն խորագրով էլ անցկացվում էր օլիմպիադան՝ երեք փուլով։
Ի դեպ, երրորդ փուլն անցկացվում էր Հեյդարապատ և Սադարակ քաղաքներում, որոնք գտնվում են Նախիջևանի Ինքնավար Հանրապետության հյուսիսային մասում՝ հենց Հայաստանի Հանրապետության սահմանակից շրջանում, և ամբողջ ադրբեջանական մամուլը ողողված էր այդ միջոցառումների լուսանկարներով։
Էլ չասեմ, որ Ադրբեջանի իշխանությունների անմիջական ակտիվ մասնակցությամբ բացվել է «Արևմտյան Ադրբեջան» հեռուստաընկերությունը, որը երեք լեզուներով առավոտից իրիկուն ներկայացնում է ներկայիս Հայաստանի Հանրապետության տարածքը՝ որպես իբր թե պատմական Ադրբեջանի տարածք և մեր բոլոր պատմական հուշարձանները ներկայացվում են որպես աղվանական հուշարձաններ։
Կրկնում եմ՝ սա ՀՀ գործող իշխանությունների ոչ ադեկվատ և թրքամետ արտաքին քաղաքականության հետևանքն է»,-ասաց Գագիկ Համբարյանը։
Նունե ԱՐԵՎՇԱՏՅԱՆ
