Երեւանի ավագանու այսօրվա նիստում «Մայր Հայաստան» խմբակցության անդամ Սամվել Հակոբյանը հայտարարեց՝ վերջերս Նոր Նորք վարչական շրջանի ղեկավարն այցելել է Ուկրաինա, Բուչա քաղաք ու արել հայտարարություններ, որոնք վնասում են մեր անվտանգային համակարգին, հայ-ռուսական հարաբերություններին, որոնք արդեն Նիկոլ Փաշինյանի ջանքերի շնորհիվ աննախադեպ վատ վիճակում են:
Հակոբյանի խոսքով՝ Նոր Նորք վարչական շրջանի ղեկավարը Երեւանի իշխանության կոալիցիոն ուժերից մեկի ներկայացուցիչն է, նրա հայտարարությունները ներքաշում են Հայաստանը Ռուսաստան-Արեւմուտք կոնֆլիկտի մեջ՝ մեր երկիրը սարքելով հակառուսական կողմ․ «Ես կուզենայի իմանալ, թե արդյոք Բուչա այցը եւ արված հայտարարությունները դրական են գնահատվում Տիգրան Ավինյանի կողմից եւ համաձայնեցված է եղել նրա հետ: Ավինյանը տեղյա՞կ է եղել այդ այցից, եւ եթե ոչ, ապա ի՞նչ կարծիք ունի այդ ամենի մասին: Եթե այո, ապա այդ ինչպե՞ս է, որ Ուկրաինան ամեն կերպ պաշտպանում է Ադրբեջանին, ողջունում է ադրբեջանական ագրեսիան ընդդեմ Արցախի, ֆոսֆորային զենք է մատակարարում Ադրբեջանին, որից հայ զինվորներ են մահանում, իսկ Հայաստանի իշխանությունը պրոուկրաինական կողմ է բռնում եւ նույնիսկ օգնություն է հասցնում մեր երկրի դեմ թշնամաբար տրամադրված։ Ուկրաինային։ Բուչայի թեմայով կա մի բլեֆ քարոզչություն, որի մեջ մենք ավտոմատ մաս ենք դառնում, երբ վարչական շրջանի ղեկավարը գնում է այդտեղ։ Չէ որ ՀՀ իշխանությունը գոնե ֆորմալ առումով ընտրել է չեզոք դիրք ռուս-ուկրաինական կոնֆլիկտի մեջ»։
Ի պատասխան այս հարցի` քաղաքապետ Տիգրան Ավինյանն ասաց՝ ունենք վարչական շրջանի ղեկավարներ, որոնք «Հանրապետություն» կուսակցության անդամներ են, ունենք վարչական շրջանի ղեկավարներ, որոնք ՔՊ-ի անդամներ են, ունենք անկուսակցական ղեկավարներ․ «Ես վարչական շրջանի ղեկավարների, որպես քաղաքապետի ներկայացուցիչներ, տեղաշարժից տեղյակ եմ, տեղեկացված եմ: Եթե ձեզ հետաքրքրում է, թե արդյոք ես տեղեկացված եղել եմ, ապա այո: Իսկ եթե ձեզ այլ մանրամասներ եւ աշխարհաքաղաքական ենթատեքստեր են հետաքրքրում, ինձ թվում է՝ քաղաքային մեր իշխանությունների եւ այս դահլիճում քննարկման շրջանակից դրանք դուրս են»:
Կարդացեք նաև
Հակոբյանն էլ արձագանքեց, որ պարզապես ուզում էր իմանալ, Նոր Նորք վարչական շրջանի ղեկավարն ինքն իրենով է գնացել այնտեղ՝ որպես իր կուսակցության ներկայացուցիչ, թե՞ քաղաքային իշխանությունը ներկայացնող․ «Եթե գնում է, դրանով նա ցույց է տվել ոչ միայն իր վերաբերմունքը, այլ նաեւ քաղաքային իշխանությունների, ես այդպես հասկացա ձեր պատասխանից»։
Հիշեցնենք, որ հունիս սկզբին Նոր Նորք վարչական շրջանի ղեկավարը Ուկրաինայում ՀՀ դեսպանի հետ այցելել էր Բուչա, ինչի կապակցությամբ ՌԴ-ն բողոքի նոտա է հղել Հայաստանին։
Նելլի ԲԱԲԱՅԱՆ
Լուսանկարները՝ Бучанська міська рада-ի
