Այսօր ԱԺ պաշտպանության եւ անվտանգության հարցերի հանձնաժողովի նիստում ՊՆ փոխնախարար Արման Սարգսյանը ներկայացրեց «Զինվորական ծառայության եւ զինծառայողի կարգավիճակի մասին» օրենքում փոփոխություններ եւ լրացումներ կատարելու մասին նախագիծը:
Գործող օրենքով, եթե մի եղբայրը ծառայում է մի զորամասում, մյուս եղբորը թույլ էին տալիս զորակոչել նույն զորամաս, եթե ծառայող եղբոր ծառայության ժամկետը չէր գերազանցել 17 ամիսը:
Վերլուծությունը ցույց է տվել, որ առավել մեծ թիվ են կազմում եղբոր 17-ից մինչեւ 18 ամսվա ծառայության միջակայքում մյուս եղբոր զորակոչի դեպքերը, դիմումները չէին բավարարվում ու դա հարուցում էր զինծառայողների ծնողների դժգոհությունը: Առաջացած խնդիրները լուծելու նպատակով, նպատակահարմար է գտնվել 17-ամսյա ծառայության ժամկետը նախատեսել 18 ամիս:
Կարդացեք նաև
Գործող օրենքով, եթե «Պատիվ ունեմ» ծրագրի ծառայության ժամկետից շուտ զորացրվում էին, պիտի վճարեին պետության՝ ուսման համար վճարած գումարի կրկնակին: Հիմա օրենքը բարելավում են ու «Պատիվ ունեմ» ծրագրից կարող են դուրս գալ առանց վճարելու, եթե զոհվածի եղբայր են կամ զավակ:
Մարտական գործողությունների ընթացքում եթե զինծառայողը տարկետման իրավունք է ձեռք բերել առողջական խնդիրների պատճառով, ժամանակավորապես ոչ պիտանի ծառայության դրույթը կտարածեն նրանց վրա:
Հռիփսիմե ՋԵԲԵՋՅԱՆ
