Aravot.am-ի տեղեկություններով՝ Աժ նախկին պատգամավոր Վիկտոր Դալլաքյանի դուստրը՝ քաղաքագետ Լիլիթ Դալլաքյանը, «ֆեյսբուք» սոցիալական կայքի օգտատեր Գ. Հ-ի կողմից մեկնաբանությունների միջոցով իր հասցեին հայհոյանքներ և սպառնալիքներ է ստացել, բայց հրաժարվել հանցագործության մասին հաղորդում տալուց:
Իրեն անպարկեշտ վարքագիծ թույլ տված օգտատիրոջը մեր տեղեկություններով, գտել են ոչ թե իրավապահները, այլ հենց անձամբ Դալլաքյանը ու նրա ամուսինը. «Հեսա կտեսնես՝ ինչ կլինի քեզ հետ, որ մենք գանք… այսպիսի բաներ էր գրում: Շարժման մասնակիցներ էին, այն առումով, որ շարժման երթերից, ցույցերից նկարներ էին տեղադրել: Երբ փորձում ես այդպիսի օգտատերերին գտնել, ջնջում են էջն ու փախնում: Միայն ոչ իսկական տղամարդը կարող է կնոջը վիրավորել ֆեյք էջերով ու փախնել: Ես էլ առաջ չգնացի այդ հարցում, որովհետեւ այդ անձը կորավ ֆեյսբուքից եւ երկրի երեսից:
Իր ծանոթներից մեկը ինձ հետ ավելի ուշ կապ հաստատեց, ասաց, որ իրեն ստիպել են գրել, ինքը ներողություն է խնդրում՝խոստանալով, որ այլեւս չի կրկնվի: Ես հրապարակայնորեն էլ եմ գրել, որ ինձ ոչ կարելի է վախեցնել ոչ էլ, եթե ինչ-որ բան եք ուզում ասել, իմ կոնտակտները կան, կարող եք գրել, ձեզ հետ մարդիկ կհանդիպեն: Դա այնքան փոքր հարց էր, որ կարող էի նաեւ չնկատել: Մանավանդ, որ գիտենք՝ ՀՀ-ում ֆեյքերի ՊՈԱԿ կա, որը թե՛ ընդդիմության, թե՛ իշխանության համար է գործում: Ինձ ուղղակի հետաքրքիր էր մեկ օգտատիրոջ օրինակով, եթե ես փորձեմ պարզել՝ ո՞վ է, կգա՞ մեր առջեւ կանգնի ու էլի նույն բանն ասի, ես տեսա, որ՝ ոչ»,- մեզ հետ զրույցում ասաց Լիլիթ Դալլաքյանը:
Կարդացեք նաև
Նա նաեւ հավելեց, որ ինքը հավասարապես քննադատում է թե ընդդիմությանը, թե իշխանությանը. «Երբեմն էլ ասում եմ, որ իրենք իրար ձեռնտու են»:
Արփինե ՍԻՄՈՆՅԱՆ
