«Սրբազան շարժումը, կարծում եմ, այս փուլում պաուզա է վերցրել: Հունիսի 12-ից հետո, երբ այս իշխանությունները ապացուցեցին, որ ստեղծել են ոչ թե ոստիկանություն, այլ գեստապո, հասկանալի էր, որ արդեն շարժմանը պետք է քաղաքական հարթակ»,-ասաց քաղտեխնոլոգ Կարեն Քոչարյանը «Հայելի» ակումբում:
«Չգիտեմ ինչու, բոլորը խուսափում են «քաղաքական» բառից: Բայց, ի վերջո, իշխանությունից հեռացնելու, իշխանության գալու եւ այլ ցանկացած պայքար ուզեք թե չուզեք, քաղաքական է՝ ինչքան էլ խուսափեք այդ բառից: Եվ առանց քաղաքական հարթակի որեւէ հարց չի լուծվի: Կարծում եմ, դա բոլորն են հասկացել: Եվ հուսով եմ՝ հիմա հենց այդ խնդիրն է լուծվում:
Չգիտեմ, դա կլինի շատ շուտով, թե, գուցե, մեկ-երկու ամիս հետո, բայց այդ հարթակի ձայնը մենք դեռ կլսենք: Ես վստահ եմ:
Այն պահից սկսած, երբ Բագրատ սրբազանը հանրահավաքների ժամանակ ասաց, որ ուզում է քաղաքական ուժերի հետ խորհրդակցել, կարծում եմ, արդեն հասկացել էին, որ առանց քաղաքական կոմպոնենտի անհնար է»,-ասաց քաղտեխնոլոգը:
Կարդացեք նաև
Հարցին, բայց երեկ սրբազանն ասաց, թե սա ընդդիմադիր պայքար չէ, ընդդիմադիրների պայքար չէ, Կարեն Քոչարյանը պատասխանեց. «Կարծում եմ, որ շատերի, այդ թվում նաեւ սրբազանի մոտ կոմպլեքս կա ընդդիմադիր, աթոռակռիվ, նախկիններ բառերից: Իսկ ո՞վ ասաց, որ Նիկոլը իրավունք ունի պայքարել աթոռի համար, ուրիշը իրավունք չունի: Նիկոլի պայքարը միայն աթոռի համար էր: Եվ մինչեւ հիմա էլ միայն աթոռի համար է: Ուրիշ ոչ մի բանի: Ժողովուրդ, եթե ուզում եք, ինձ մի հավատացեք, ուրիշ ոչ մեկին մի հավատացեք: Պարզապես, դրեք, տեսեք՝ ինչ էր ասում:
Ես գտնում եմ, որ հունիսի 12-ի մասին ամենահանճարեղ բանը, որ արվել է, այն երկու կադրերն էին՝ ժողովրդավար Նիկոլի եւ բռնապետ Նիկոլի խոսքերը լուսաձայնային նռնակների մասին:
Ասում էր՝ քաղաքացին տուգանքի մատերիալ չի ու հիմա ձեզ ոնց է տուգանում, ինչեր էր պատմում տարբեր թիկնապահներով տեղաշարժվելու ու հեծանվով, ոտքով ման գալու մասին, ԱԺ դռները բացելու ու հիմա զոդած պահելու մասին: Ամեն ինչը, որ նայեք, կհասկանաք, որ որեւէ բան ձեզ համար չի արել: Ու հիմա դիմում եմ ցանկացածին, որը դեռ որեւէ կերպ մի չնչին հավատում է այս ստախոսներին, որ դնեն, նայեն, թե ինչքանով է փոխվել անձամբ իրենց կյանքը եւ ինչպես է փոխվել «փրկիչների» կյանքը: Ինչ էիք անում դուք եւ հիմա ինչ եք անում, ինչ էին անում նրանք ու հիմա ինչ են անում: Կտեսնեք, որ պայքարը բացառապես աթոռի համար էր:
Ու ինչպիսի՜ գումարներ են ծախսում: Օրինակ, ամենայն հայոց աներձագը չգիտեմ քանի անշարժ գույք է հայտարարագրել, ով ինչ է հայտարարագրել: Իհարկե, ասում են՝ նվեր են ստացել պապայից, մամայից, հորեղբորից եւ այլն: Բայց հետաքրքիր է. մինչեւ իշխանության գալը ինչո՞ւ այդպիսի նվերներ չէին ստանում: Ինչո՞ւ Աննա Հակոբյանին 10 միլիոն դրամ չէին նվիրում, երբ որ ինքը միայն «Հայկական ժամանակի» գլխավոր խմբագիրն էր: Դա ո՞նց է լինում»,-ասաց Կարեն Քոչարյանը:
Աշոտ ՀԱԿՈԲՅԱՆ
