Մայրաքաղաքի տարբեր վարչական շրջաններում փոսալցման եւ միջին վերանորոգման աշխատանքները ձգձգվում են տեխնիկական հսկողություն իրականացնող կազմակերպությունների ոչ պատշաճ աշխատանքների պատճառով։ Այս մասին այսօր զեկուցվեց քաղաքապետարանում գործակարգավարական խորհրդակցության ժամանակ։
Շինարարության եւ բարեկարգման վարչության պետի ժամանակավոր պաշտոնակատար Արմեն Հարությունյանը զեկուցեց, որ փոսալցման աշխատանքների տեխնիկական հսկողություն իրականացնող կազմակերպության հետ պայմանագիրը լուծվել է, նոր պայմանագիրն այսօր կկնքվի եւ կշարունակվեն աշխատանքները Մալաթիա-Սեբաստիա,Աջափնյակ, Քանաքեռ-Զեյթուն եւ Շենգավիթ վարչական շրջաններում։
Ավան վարչական շրջանի ղեկավար Վահե Հակոբյանն էլ զեկուցեց, որ տեխզննողի հետ պայմանագիրը լուծել են, դիմել են մեկ անձով գնումով պատվիրել աշխատանքը, նոր ընկերության հետ պայմանագիր շուտով կկնքեն, ըստ այդմ էլ կշարունակեն աշխատանքները։
Էրեբունի վարչական շրջանում էլ նույն խնդիրը կա, թաղապետ Ալբերտ Հովասափյանն ասաց, որ փոխքաղաքապետի հետ պայմանավորվել են, որպեսզի կատարված աշխատանքների համար վճարեն, հետո նոր պայմանագիրը կնքեն․ «Որովհետեւ եթե նոր տեխհսկող գար, չէինք կարող պատկերացնել՝ այդ աշխատանքները ոնց էր ընդունելու։ Ֆինանսավորումը ոնց որ թե չի եղել, կազուսային վիճակ է մեզ մոտ»։
Կարդացեք նաև
Վահե Հակոբյանն էլ հավելեց, որ իրենց շրջանում աշխատանքները չեն ընդունել, վճարման խնդիր չունեն, քանի որ լավ չէր կատարվել աշխատանքը․ «Երկու անգամ քանդել ենք տվել»։
Քաղաքապետ Տիգրան Ավինյանն էլ արձագանքեց․«Որքան հիշում եմ այդտեղ տեխհսկողության հետ կապված խնդիրն այն էր, որ տեխհսկողը մեկ այլ ընկերության հետ փոխկապակցված էր, որը գնացել էր սեւ ցուցակ։ Ինքն ի սկզբանե մեզ մոլորության մեջ է գցել։ Էդքան իրանց դարդը մի լացեք, չգիտենք ովքեր են, կարեւոր էլ չի, բայց մեր խնդիրն աշխատանքներն առաջ տանելն է, ոչ թե այսպես ասած․․․»։
Մի քանի վարչական շրջանների ղեկավարներ հավելեցին, որ իրենց մոտ էլ նման խնդիրներ կան։
«Էս շաբաթ ավարտեք, մյուս շաբաթ, որ էդ հարցը տրվի, ասվի՝ վսյո, ունենք տեխհսկող, աշխատում ենք»,-հանձնարարեց Ավինյանը։
Նելլի ԲԱԲԱՅԱՆ
