Ժնևի ՄԱԿ գրասենյակում Հայաստանի մշտական ներկայացուցիչ Անդրանիկ Հովհաննիսյանի ելույթը Մարդու իրավունքների խորհրդի 56-րդ նստաշրջանին
Պարոն նախագահ,
Հայաստանը շնորհակալություն է հայտնում Բարձր հանձնակատարին տարեկան զեկույցը ներկայացնելու համար:
Պատերազմների դաժանությունը և դրանց հարուցած խորը տառապանքները խարխլում են մարդու իրավունքների հիմքերը: Տագնապալի էր, թեև ակնկալելի, որ Բարձր հանձնակատարն իր խոսքի բացման մասում կենտրոնացավ օրեցօր աճող հակամարտությունների իրավիճակներում մարդու իրավունքների ոտնահարումների վրա: Նորից ու նորից ստիպված ենք տալ դասական հարցը՝ «ո՞ւմ համար են ղողանջում զանգերը»:
Մեկ տարի առաջ, այս բարձր ամբիոնից Մարդու իրավունքների ՄԱԿ Բարձր հանձնակատարը զգուշացրեց մարդասիրական այն ծանր հետևանքների մասին, որոնց կարող է հանգեցնել Լաչինի միջանցքի արգելափակումը, որը Լեռնային Ղարաբաղի հարյուր հազարից ավել հայերին արտաքին աշխարհի հետ կապող միակ կյանքի ճանապարհն էր: Նրա մտահոգությունը կիսում էին ՄԱԿ-ի Գլխավոր քարտուղարը, Ցեղասպանությունների կանխարգելման հարցրով ՄԱԿ-ի Գլխավոր քարտուղարի հատուկ խորհրդականը, Արդարադատության միջազգային դատարանը, ՄԱԿ-ի՝ մարդու իրավունքների հարցերով գրեթե ողջ համակարգը: Սակայն, վաղ ազդարարման այս հստակ նշաններին չհետևեց միջազգային և ոչ մի գործողություն: Եվ որպես դրա հետևանք, բացարձակ անպատժելիության մթնոլորտում Ադրբեջանը հարձակվեց և էթնիկ զտում իրականցրեց Լեռնային Ղարաբաղում:
Կարդացեք նաև
Մենք, անշուշտ, համաձայն ենք Բարձր հանձնակատարի հետ, որ Արդարադատության միջազգային դատարանի որոշումները, որոնք պարտադիր են կատարման համար, պետք է իրականացվեն անվերապահորեն: Բոլոր նրանք, ովքեր ենթարկվել են կամայական կալանավորման պետք է անհապաղ ազատ արձակվեն: Մենք նաև կիսում ենք Բարձր հանձնակատարի մտահոգությունը ՄԱԿ-ի մարդու իրավունքների պաշտպանության համակարգի ներկայացուցիչների դեմ հնչեցված սպառնալիքների ու հաշվեհարդարի փորձերի առնչությամբ:
ՀՀ ԱԳՆ
