ՀՀ ԱԳ նախարար Արարատ Միրզոյանն այսօր ասել է, որ Ադրբեջանը դեռեւս չի պատասխանել Հայաստանի առաջարկին՝ մեկ ամսվա մեջ ամփոփել եւ ստորագրել «խաղաղության պայմանագիրը»։ Ավելի վաղ, ՀՀ ԱԳՆ-ն հայտարարությամբ էր հանդես եկել, որտեղ նոյեմբերին սպասվող պատերազմի մասին նախազգուշացում կա։
Լրագրողների հետ ճեպազրույցում ԱԺ «Պատիվ ունեմ» խմբակցության պատգամավոր Տիգրան Աբրահամյանը, անդրադառնալով այս հայտարարություններին, ասաց․ «Հայաստանի իշխանությունը տարբեր փուլերում, ինչպես իրեն անհրաժեշտ է, խաղաղության եզրույթը կիրառում է։ Նույնիսկ այնտեղ, որտեղ ակնհայտորեն որեւէ բան չկա խաղաղության մասին, հանրությանը մոլորեցնելու, շանտաժի եւ սպառնալիքի ենթարկելու պայմաններում, օգտագործելով խաղաղության դրոշակը, գնում են ադրբեջանական զիջումների»։
Ըստ Աբրահամյանի՝ Ադրբեջանը պատրաստ է այդ թվում՝ ուժի կիրառման միջոցով հասնելու իր հռչակած նպատակներին, որոնք ենթադրում են նաեւ ՀՀ տարածքների նկատմամբ վերահսկողություն, Հայաստանի նկատմամբ դիրքային ու ռազմավարական առավելություն, որեւէ փուլում նաեւ շատ ակտիվ փուլ է մտնելու, այսպես կոչված, միջանցքային տրամաբանության իրացումը։
«Իսկ Հայաստանի իշխանությունները սա տարբեր փուլերում տարբեր ձեւ են օգտագործելու։ Մի տեղ լինելու է զոհ, փորձելու են դրանից որեւէ բան ստանալ իրենց համար։ Մի փուլում զիջումներ անելու համար դիմում են ժողովրդին, ասելու՝ եթե չգնանք զիջումների, եթե հերթական զիջումը չանենք, պատերազմ ենք ստանալու։ Քաղաքական իմաստով եւ մեր քաղաքացիների համար էլ ընկալելի չէ՝ մի շաբաթ հայտարարել մեկ բան, հաջորդ շաբաթ՝ լրիվ այլ բան։ Բայց մեր իրականությունն այդպիսին է՝ իշխանությունն անընդհատ խեղաթյուրում է իրական իրադրությունը, մեկ այլ իրավիճակում ըստ նպատակահարմարության դա բերում է առաջին պլան»։
Կարդացեք նաև
Ռոզա ՀՈՎՀԱՆՆԻՍՅԱՆ
