ԱԺ «Հայաստան» խմբակցության պատգամավոր Արմենուհի Կյուրեղյանը հունիսի 12-ին քաղաքացիների նկատմամբ ոստիկանության կիրառած բիրտ ուժը համարում է իշխանությունների հայտարարած ժողովրդավարության բաստիոնի իրական պատկերը:
«Այսպես են իրենք պատկերացնում ժողովրդավարությունը: Ինչպես կարող է ժողովուրդը դուրս գալ խաղաղ ցույցի եւ որեւէ բան պահանջել իշխանություններից: Եթե պահանջում եք` կստանաք այսպիսի պատասխան »,- այսօր «Հայելի» ակումբում ասաց տիկին Կյուրեղյանը:
Հունիսի 12-ի դեպքերը, ըստ պատգամավորի, ԱԺ դահլիճից դուրս Փաշինյանի կողմից ուղղված հրահանգի արդյունք էր: Պատգամավորը հիշեց, որ այդ օրը ԱԺ եկած Փաշինյանը երկու անգամ դուրս եկավ դահլիճից, հետո հայտարարեց, որ ուղղակիորեն խոսել է ոստիկանապետի հետ, փորձել է ճշտել՝ ինչ է կատարվել. «Երբ նա խոսում էր, հայտարարեց, որ ինքը համոզված է, որ ոստիկանները գործում են օրենքի շրջանակներում ու ինքն ինչպես խրախուսել, այնպես շարունակելու է խրախուսել առավել սկզբունքային ոստիկաններին: Սրանից լավ նյութական շահագրգռությո՞ւն, սրանից լավ ուղղակի կո՞չ՝ արեք այն ամենն՝ ինչի կարիքը կա, միայն այս ցուցարարներին լռեցրեք, վախեցրեք, ես տեր եմ»:
Տիկին Կյուրեղյանը նաեւ անդրադարձավ ՀՅԴ-ականների ապօրինի գաղտնալսման գործին:
Կարդացեք նաև
«Ինչ-որ կադրեր ու բառակապակցություններ ձեր ուզած մեկնաբանությամբ հանել ու հարձակվել եք ՀՅԴ գործիչների վրա: Նրանք այդ ապօրինի գաղտնալսումների հիման վրա չէին կարող կարել քրեական գործեր, դրա համար էլ այդ գաղտնալսումները իրենց ենթարկվող կայքերի միջոցով տարածվեցին ու դրանց հղում տալով՝ գործեր կարեցին: Այս պահի դրությամբ 5 անձ կալանավորվել է Վայոց ձորից երկու ամսով՝ տեսակցության արգելքով, ունենք 3 դաշնակցական ընկեր, որոնց նկատմամբ տնային կալանքն է կիրառվել որպես խափանման միջոց: Ընդ որում՝ նրանցից մեկը կին է՝ երեք անչափահաս երեխայի մայր: Ունենք մեկ անձ, որը գրավով է դուրս եկել եւ միայն այս ներկայացրած փաստերը Վայոց ձորի մարզային կոմիտեի անդամների հանդեպ: Ինչո՞ւ Վայոց Ձորի, ինչո՞ւ ՀՅԴ, լուրջ հարցեր են, չէ՞, առաջանում»,- նկատեց Կյուրեղյանը:
Արփինե ՍԻՄՈՆՅԱՆ
