Այսօր Բաղրամյան պողոտայում «Տավուշը հանուն հայրենիքի» շարժման հանրահավաքի ժամանակ «Հայաստան» խմբակցության պատգամավոր Գառնիկ Դանիելյանը հայտարարեց, որ սպառնում են շարժման անդամներին, թիրախավորում արցախցիներին. «Բայց մենք ցույց ենք տվել, որ բոլոր այդ սպառնալիքների վրա թքած ունենք, ոչ ոք ու ոչինչ հետ չի պահի մեզ պայքարից»:
Գառնիկ Դանիելյանն ասաց, որ շարժման այս օրերին հասել են հետեւյալին. «Մենք ոչ մի տեղ չենք փախել, իրենք են փախել, մտել բունկերները, ճողոպրել, Սարդարապատ չեն եկել, կառավարության նիստ են հետաձգել, հատուկ միջոց են կիրառել, որ ճողոպրեն: Բայց մենք չենք ընկրկելու»:
Գառնիկ Դանիելյանը հիշեցրեց. «Ամբողջ իրենց նախընտրական ծրագիրը ձախողել են, ասել են՝ Շուշի, Հադրութի դեօկուպացիա, Արցախը հանձնել են, խոսել են արդարությունից, հավասարություն, իրավական համակարգի բարելավումից, բայց ծայրից ծայր ձախողել են ու պիտի պատասխան տան: Ժողովրդին ասում էին քացով դուռը կբացեք, ուզեք՝ հրաժարական կտանք, բայց փախած են: Սրանք ժամանակի վրա են խաղում, մտածում են ժողովուրդը կհոգնի պայքարից ու իրենք կհասնեն վերջնական իրենց նպատակներին: Մենք իրենց հնարավորություն ենք տվել, որ օգտագործեն այս պահը, հնարավորությունը եւ գան երկխոսության, տապալման ամբողջ պատասխանատվությունը իրենց ուսերի վրա է: Մինչեւ այս պահը խելքները գլուխները չեն հավաքել»:
Կարդացեք նաև
Մանրամասները՝ տեսանյութում
Հռիփսիմե ՋԵԲԵՋՅԱՆ
