«Իրականում այս շիրիմները մեկ անուն ունեն․ հայության անունն են կրում, մեր պատվի անունն են կրում, մեր արժանապատվության անունն են կրում, մեր ճշմարտության անունն են կրում եւ մեր հաղթանակի անունն են կրում՝ բոլորը միասին, ինչքան էլ տարանջատված, յուրաքանչյուրն իր անունով»,- Եռաբլուր զինվորական պանթեոնում, լրագրողների հետ զրույցում ասաց «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը։
Հիշեցնենք, Իգոր Մուրադյանի մահվան 6-րդ տարելիցի առիթով, «Տավուշը հանուն հայրենիքի» շարժման առաջնորդ Բագրատ արքեպիսկոպոս Գալստանյանը զոհված զինծառայողների ծնողների, քաղաքացիների հետ «Եռաբլուր» զինվորական պանթեոնում էր։
«Հավաքական նկարագիր է սա։ Պատիվն իրենցն է՝ անպատվությունը մերը, հաղթանակն իրենց է՝ պարտությունը՝ մերը, վեհությունն իրենցն է՝ ամոթը մերը»,- ասաց սրբազանը՝ հավելելով, որ իրավունք չունենք Եռաբլուրը գերեզմանատան վերածելու, այստեղ պետք է այցելել իբրեւ ուխտատեղի։
Կարդացեք նաև
«Մեր տղաները մեզ համար երբեք մահացած չեն կարող լինել, այս շիրիմները սոսկ խորհրդանիշներ են։ Սա այն մեծ փաղանգն է մեր կյանքի, որը մեզ առաջնորդում է անընդհատ»,- ասաց սրբազանը՝ հավելելով, որ իր հուզմունքը գալիս է նրանից, որ ոչ թե մեր տղաները նահատակվել են, նրանք գիտեն, թե ինչ են արել, այլ նրանից, որ ամոթի մեջ ենք ապրում։
Մանրամասները՝ տեսանյութում
Նելլի ԳՐԻԳՈՐՅԱՆ
