Հունիսի 15-ին «Հարավկովկասյան երկաթուղի» ընկերությունը, նախատեսված ժամկետից վեց օր շուտ, բացել է երկաթուղու երթևեկությունը Հայաստանի հյուսիսում ավերիչ ջրհեղեղից հետո վերականգնված հատվածներում։
Հանրապետությունն արտաքին աշխարհի հետ կապող միակ երկաթուղու երթևեկության արագ վերականգնման գործում հայ մասնագետներին ակտիվ աջակցություն են ցուցաբերել «Ռուսական երկաթուղիներ» ԲԲԸ-ի տարբեր ստորաբաժանումների ռուս գործընկերները։ Այս մասին պայմանավորվածություն է ձեռք բերվել Հայաստանի փոխվարչապետ Մհեր Գրիգորյանի և Ռուսաստանի կառավարության նախագահի տեղակալ Ալեքսեյ Օվերչուկի միջև մայիսի վերջին:
Վթարավերականգնողական աշխատանքների կազմակերպման և աջակցության նպատակով մայիսի վերջին Հայաստան են գործուղվել «Ռուսական երկաթուղիների» ղեկավարներն ու մասնագետները՝ ենթակառուցվածքի Կենտրոնական տնօրինության պետի տեղակալ Անդրեյ Կուչինի նախագահությամբ: Ընդհանուր առմամբ, աշխատանքներին մասնակցել են 40 մասնագետներ «Ռուսական երկաթուղիների» կառուցվածքային ընկերություններից՝ «Ռոսժելդորպրոեկտ», «Տրանսէներգո», «Տրանսէլեկտրոպրոեկտ», ինչպես նաև ճանապարհային վարպետներ, շինարարական տեխնիկայի մեքենավարներ, արհեստական կառույցների ինժեներներ, գեոդեզիստներ, Էներգետիկներ Հյուսիս-Կովկասյան, Վոլգայի, Օկտյաբրսկի, Հարավ-Արևելյան և Հյուսիս-արևմտյան երկաթուղիներից: Բացի այդ, 10 մասնագետ և շինարարական աշխատանքներում անհրաժեշտ շարժակազմ է տրամադրել «Վրացական երկաթուղին»:
24/7 ռեժիմով իրականացված աշխատանքների ընթացքում կատարվել են աննախադեպ ծավալի հողային աշխատանքներ, լցվել են տասնյակ հազարավոր տոննա մանրացված քար և կոպիճ, վերականգնվել են ջրահեռացման ինժեներական կառույցները, քարշային էլեկտրակայանները, կոնտակտային ցանցերը, տարբեր լարման էլեկտրահաղորդման գծերը, կապի գծերը, կայանային ենթակառուցվածքները, այդ թվում ՝ կայարանային ենթակառուցվածքները: Ընդհանուր առմամբ վերակառուցվել է մոտ 2 կիլոմետր ճանապարհ։
Կարդացեք նաև
ՀԿԵ գլխավոր տնօրեն Ալեքսեյ Մելնիկովը նշում է, որ ջրհեղեղի հետևանքով առաջացած երկաթուղու ավերածությունները աննախադեպ էին Հայաստանի երկաթուղիների պատմության մեջ: «Մենք բախվեցինք տարերքի, որի մասշտաբներն աննախադեպ և անկանխատեսելի էին Հայաստանում երկաթուղու գոյության ողջ պատմության ընթացքում։ Մեր ռուս գործընկերների օգնությամբ մենք կարողացանք վերականգնել երթևեկությունը քանդված հատվածներով այն ժամկետներում, որոնք սկզբում մեզ անհնարին էին թվում։ Այս կապակցությամբ կցանկանայի շնորհակալություն հայտնել բոլոր նրանց, ովքեր մասնակցել են վերականգնողական աշխատանքներին։ Իրականում դա Հայաստանի, Ռուսաստանի և Վրաստանի տասնյակ հարյուրավոր մասնագետների համակարգված և պրոֆեսիոնալ աշխատանքն էր, որը գերազանց արդյունք տվեց», – նշեց Ա.Մելնիկովը:
«Ռուսական երկաթուղիների» բոլոր մասնագետները պարգևատրվել են ՀԿԵ «Փոխօգնության» մեդալով և ՀԿԵ գլխավոր տնօրենի անվանական ժամացույցով:
«Հարավկովկասյան երկաթուղի» ընկերության մամուլի հաղորդագրություն
