Բաղրամյան պողոտայում՝ Ազգային Ժողովի մոտ ոստիկանական, ըստ տարածված տեսանյութերի, անհամաչափ ուժի կիրառման արդյունքում բազմաթիվ անձինք տարբեր աստիճանի վիրավորում են ստացել։
Կատարվածը 2018-ի հեղափոխությունից հետո տեղի ունեցած, իշխանական սիրելի եզրույթներից մեկով ասած, հերթական «աննախադեպ» իրադարձությունն էր։
Կարդացեք նաև
Ցավոք, 2018-ից հետո տեղի են ունեցել բազմաթիվ «աննախադեպ» զարգացումներ։ Այսօրվանը, բնավ, առաջինը չէր և չի լինի նաև վերջինը։
Արցախի ճանաչումը Ադրբեջանի կազմում աննախադեպ էր։ Արարատի դեմ արշավը աննախադեպ է։ Հղի Սոնա Մնացականյանին վարչապետին ուղեկցող մեքենաներից մեկով վրաերթի ենթարկելը և մինչ այժմ պատիժ չկրելն աննախադեպ էր։ Գարեգին Բ Ամենայն Հայոց Կաթողիկոսի մուտքը Սարդարապատ արգելափակել փորձելն աննախադեպ էր։
Աննախադեպ են նաև ներքին թշնամանքի գեներացումը։ «5-րդ շարասյուն», «11.000 դասալիք», «ռուսի ագենտ»։ Ցուցակը սպառիչ չէ։
Այս բոլորը, սակայն, իշխանությունները հանգիստ մարսել են։ Սա հաշվի առնելով՝ պետք չէ կարծել, որ Բաղրամյանում այսօրվա «աննախադեպությունը» վերջինն էր։
Aravot.am-ին ԱԺ նախկին պատգամավոր Նաիրա Զոհրաբյանն ասաց, որ Նիկոլ Փաշինյանն այսօր անցավ «վերջին կարմիր գիծը»
Փաշինյանի դեպքում դժվար ասել՝ նա վաղո՞ւց էր անցել վերջին կարմիր գիծը, այսօ՞ր անցավ, թե՞ դեռ չի էլ անցել։ Բացառել պետք չէ, որ վաղը կամ մեկ շաբաթ հետո ականատես կլինենք ևս մեկ «աննախադեպ» իրադարձության, որի մասին կանխատեսելն անհնար էր։
«Իշխանությունը, նույնիսկ լավը լինելով, ոչ այլ ինչ է, քան անհրաժեշտ չարիք։ Վատը լինելով՝ այն անհանդուրժելի է», – ամերիկացի լուսավորչական փիլիսոփա, Ամերիկյան հեղափոխության մասնակից Թոմաս Փեյն։
Արսեն ԱՅՎԱԶՅԱՆ
