«Որքան էլ միջազգային կենտրոններն օգտագործելով այս իշխանություններին՝ փորձում են աչք փակել տեղի ունեցած զազրելի հանցագործությունների վրա, միեւնույն է, արդարադատությունը հասնելու է իր նպատակին»,- խորհրդարանական ճեպազրույցներում հայտարարեց «Հայաստան» խմբակցության քարտուղար Արծվիկ Մինասյանը։
Արթուր Խաչատրյան
«Հայաստան» խմբակցության պատգամավոր Արթուր Խաչատրյանի գնահատմամբ էլ՝ Նիկոլ Փաշինյանը խորհրդարանում հերթական ինքնախոստովանական ցուցմունքն է տվել՝ ասելով, որ ինքն է հասունացրել Լեռնային Ղարաբաղի հանձնումը․ «Մարդը, որը հայտարարում է, որ ինքն արդեն 2018 թվականին գիտեր, որ Ղարաբաղը չի կարող լինել Հայաստանի կազմում, իր՝ 2018-ից 2020 թվականի գործունեությունը միտված է եղել իրավիճակը լարելուն, ու Ադրբեջանը դա շատ նրբորեն օգտագործել է»։
Ընդդիմադիր պատգամավորի խոսքով՝ վերջին ԱԺ-կառավարություն հարցուպատասխանը կարող է ամբողջովին օգտագործվել ապագայում՝ դատական գործընթացների ժամանակ։
Մանրամասները՝ տեսանյութում
Կարդացեք նաև
«Բագրատ սրբազանը ոչ մի գրոհի մասին հայտարարություն չի արել»,- ասաց Արծվիկ Մինասյանը՝ պատասխանելով լրագրողի դիտարկմանը, որ ցույցն առաջնորդող Բագրատ սրբազանը ԱԺ-ն գրոհելու կոչեր է հնչեցրել։
Նա տարակուսեց՝ Նիկոլ Փաշինյանի, այս առիթով խորհրդարանի ամբիոնից ոստիկանությանն արդարացնող հայտարարություններից․ «Ինքը հաճույք է ստացել ժամանակին, որ ոստիկանները իրեն նսեմացրել են, ստորացրել են․ հիմա իշխանությունը իր ձեռքն է, ասում է՝ հա, բա պիտի անեին։ Սա արդեն բացատրելու բան չի, սա քրեաիրավական հետեւանք պետք է ունենա»։
Անդրադառնալով Անդրանիկ Քոչարյանի հայտարարությանն էլ, թե զոհեր չենք ունեցել՝ հավելեց՝ Նիկոլ Փաշինյանը լիներ փողոցում, անպայման մահ լինելու էր, ինչպես 2018-ին։
Արթուր Խաչատրյանն էլ հիշեցրեց՝ 2018-ի հոկտեմբերի 2-ի գիշերը Նիկոլ Փաշինյանն ինքը իր աջակիցներին կոչ արեց՝ գրոհել ԱԺ շենք, մտնել ներս, ճնշում գործադրել պատգամավորների վրա՝ հայտարարելով, որ այդ ժամանակ Նիկոլ Փաշինյանը զավթել է իշխանությունը։
Հիշեցնենք, հունիսի 12-ին ոստիկանությունը հատուկ միջոցներ, այդ թվում՝ նաեւ բեկորային, կիրառեց «Տավուշը հանուն հայրենիքի» ցույցի ժամանակ։ Հատուկ միջոցները կիրառվեցին խաղաղ ցուցարարների դեմ․ կան մի քանի տասնյակ վիրավորներ։
Նելլի ԳՐԻԳՈՐՅԱՆ
