«Արդյունքների մասով շատ ակնկալիք չունենալով՝ այդուհանդերձ մենք մեր կնիքը պետք է դնենք, փորձենք, տեսնենք՝ ինչ է։ Ամեն մարդ թող փորձի գտնել իր շրջապատում եղած պատգամավոր մը»,-Բաղրամյան պողոտայում ամփոփելով հանրահավաքը՝ հայտարարեց «Տավուշը հանուն հայրենիքի» շարժման առաջնորդ Բագրատ սրբազանը։
Նա ժողովրդին ասաց՝ պետք է ջանք թափել, որ ամսի 17-ին հաջողեն։
Բագրատ սրբազանն ասաց՝ Աստված այդպես է գործում․ մեզ թվում է՝ ինչ որ բան, ինչ որ տեղ չի ստացվում, բայց այդ չստացվածը դառնում է ամենաստացվածը և ամեն բան իր ժամանակով գալիս, լուծվում է այնպես, ինչպես մեր կարիքն է, ինչպես ինքը գիտի։ Ասաց՝ իմ կյանքը այդպես է եղել, վստահ եմ՝ ձեր կյանքն էլ։
Հետո էլ ասաց՝ ովքեր այսօր են ուզում հավաքել վրանները, թող այսօր հավաքեն, ովքեր վաղն են ուզում, վաղը։ Հանրահավաքի մասնակիցներից ասացին՝ ճիշտ է, որ իրար հետ անենք։
Բագրատ սրբազանն ասաց․ «Ճշտի որոշում կա՞։ Ճիշտը մեկն է․ էս մարդը պիտի գնա, դրանից էն կողմ էլ ճիշտ չկա»։
Կարդացեք նաև
Հետո էլ ասաց՝ մի հանեք վրանները, առավոտյան միասին կհանենք․ «Ես մի քիչ ժողովրդավար մարդ եմ, դրա համար։ Էդ բառն էլ սովորեցի։ Ազատ կամքը հարգող մարդ եմ, էն որ աստվածատուր է։ Աստված մարդուն ազատ կամքով է ստեղծել։ Երբ մարդը որոշեց դրախտից դուրս գալ, իր ազատ կամքով է որոշել, և Աստված միշտ հարգել է այդ կամքը։ Չի տվել ազատ կամքը, ասել է՝ ինչ ուզում ես, իրավունքով իրացրու, հետո էլ ասես՝ ես պատասխանատու եմ, բայց հո մեղավոր չե՞մ։ Դա մեղք է ասելը։ Աստված ասել է առ քո ազատ կամքը, բայց հիշիր, որ դրա համար պատասխանատու ես»։
«Հիմա» երգով, Անկախության հիմներգով և աղոթքով Բաղրամյան պողոտայում ամփոփվեց հանրահավաքը։
Լուսանկարը՝ «Տավուշը հանուն հայրենիքի» էջի:
Տաթև ՀԱՐՈՒԹՅՈՒՆՅԱՆ
