«Նայում եմ այսօր ու հիշում եմ երեկը, երբ ոստիկանության բարձրաստիճան պաշտոնյաների հետ խոսում էինք, բանակցում էինք, թե ինչու են փակել ճանապարհը, բացեն, ասում էին՝ շինությունն ենք պաշտպանում։ Այս շինությունն այսօր էլ է այստեղ․ ի՞նչ փոխվեց։ Պարզվեց շինությունը չէին պաշտպանում․ անձի էին պաշտպանում։ Շինությունները մնալու են, անձինք գնալու են»,- Բաղրամյան պողոտայում հավաքի ժամանակ հայտարարեց իրավապաշտպան Սերգեյ Հարությունյանը։
Անդրադառնալով Հաթերքի գյուղապետի ձերբակալությանը՝ հայտարարեց․ «Բռնի կերպով ազատությունից զրկել էին․ 7, 9, 13 տարեկան երեխաներին թողել էին մայրուղու վրա։ Երեխաները ժամերով սպասել էին՝ մինչև այլ մարդ կմոտենա, նրանց կտանի։ Ինձ մոտ տպավորություն է, որ մի ուժ մրցույթ է հայտարարել՝ ամենավատ կամ ստոր ոստիկան անվանակարգով, և ինչ-որ անձինք մասնակցում են»։
Իրավապաշտպանը, կրկին խոսելով երեկվա մասին, ասաց․ «Ոստիկաններին խնդրել ենք, որ ժամանակ տան, որ լարվածությունն անցնի․ երբ զրուցում էինք, կարծես ամեն ինչ լավ էր, հետո տեղի ունեցավ սադրանքը, որի հետևանքով համոզվեցինք, որ ոստիկանության համակարգում եղած անձանց անկման ձնագունդը սահման չունի։ Երեկ անհամաչափ ուժ կիրառվեց խաղաղ բնակչության նկատմամբ, բազմաթիվ փոքրիկ երեխաներ, սայլակներում երեխաներ։ Վստահ եմ, որ մարդիկ վաղ թե ուշ այդ արարքի համար պատասխանատվություն են կրելու։ Այսօր գրված էր, որ «Զարյա 3» են օգտագործել։ Դա օգտագործում են ահաբեկչական խմբավորումների դեմ՝ հանցագործությունները մեկուսացնելու ժամանակ։ Ստացվում է՝ այստեղ հանցագործնե՞ր էին՝ խաղաղ բնակչությունը, կանայք, փոքրահասակ երեխաները։ Պարզ է, չէ՞, որ տղայի ձեռքը կտրվեց, նույն հաջողությամբ կարող էր այդ նռնակը ընկնել սալյակի մեջ, երեխայի կպչել կամ ինչ-որ մարդու գլխի։ Հողերը հանձնեցին, բայց այլ մարդու ձեռք կտրվեց»։
Կարդացեք նաև
Իրավապաշտպանը հայտարարեց բոլոր ձերբակալված անձանց անունները և հայտնեց, որ բոլոր ձերբակալված տղաները դիմել են, որ իրենց հանրային պաշտպան տրամադրեն։
Տաթև ՀԱՐՈՒԹՅՈՒՆՅԱՆ
