ԱԺ նիստում ՔՊ խմբակցության պատգամավոր Արուսյակ Ջուլհակյանը հարցրեց ԿԲ նախագահ Մարտին Գալստյանին․ «Մի հարց տամ, կարող է տարօրինակ թվալ, եւ ինձ էլ է շատ տարօրինակ թվացել, երբ ես լսել եմ դա։ Մեր գործընկեր Գառնիկ Դանիելյանը երեւի մի երկու շաբաթ առաջ հայտարարեց, որ վերջին շրջանում ՀՀ բավականին մեծ թվով տրանսֆերտներ են եկել Ադրբեջանից։ Եվ ասաց, որ որեւէ մեկը չի կարողանում պարզաբանել, թե դրանք ինչ տրանսֆերտներ են, ում են ուղարկվել այդ փողերը։ Ես ձեզ պետք է խնդրեմ հերքել կամ հաստատել այս տեղեկությունը»։
ԿԲ նախագահն ասաց, որ Գառնիկ Դանիելյանն իրենց էլ է այց հարցն ուղղել։ «Մենք վարում ենք Հայաստան եկած տրանսֆերտների առաջին 50 խոշորի վիճակագրությունը։ Եվ առաջին 50-ի մեջ Ադրբեջանը չկա։ Եթե առաջին 50-ի մեջ Ադրբեջանը չկա, տրամաբանական շղթան շարունակելով կարող ենք ենթադրել, որ կամ գումարները չափազանց փոքր են, կամ ընդհանրապես չկան։
Ես հիշում եմ՝ սրանից տարիներ առաջ մեծ աղմուկ եղավ, մենք ժամանակին ուսումնասիրություն արեցինք, այնտեղ մի փոխանցում էր արվել միջազգային մի կազմակերպությունը Ադրբեջանից Հայաստան, թե Հայաստանից Ադրբեջան փոխանցում էր կատարել, ինչ-որ 30 հազար եվրոյի պատմություն կար։ Դա է եղել, այս նոր 50-ի մեջ Ադրբեջանը չկա»,- ասաց Մարտին Գալստյանը։
Նշենք, որ «Հայաստան» խմբակցության պատգամավոր Գառնիկ Դանիելյանն ասել էր, թե 2018 թվականից հետո Ադրբեջանից Հայաստան 200 միլիոնից ավել փոխանցում է արվել։
Կարդացեք նաև
Ռոզա ՀՈՎՀԱՆՆԻՍՅԱՆ
