«ՔՊ-ն փորձում է հերթական մանիպուլյացիայով ու մանր ժուլիկությամբ տարակուսանքի մեջ գցել ժողովրդին: Տարածել են, թե իբր կառավարության հրաժարականի եւ նոր կառավարության ձեւավորման վերաբերյալ սրբազանի գլխավորությամբ կիրակի օրը ժողովրդի պահանջով, որ երկու խմբակցություններով նախաձեռնել ենք, իբր այդ հարցի քննարկումը հետաձգվել է»,- Բաղրամյան պողոտայում պայքարի հերթական օրվա ամփոփման ժամանակ ասաց ԱԺ դաշնակցական պատգամավոր Արծվիկ Մինասյանը:
«Դա սուտ է, հարցի քննարկումը հրավիրած ԱԺ արտահերթ նիստը շարունակում է մնալ ամսի 17-ին ժամը 18:30-ին: Սա փոփոխման ենթակա չէ, սա իրավունքի ուժով պարտադրված նիստ է եւ պետք է գումարվի, միայն մնում է մեկ բան՝ ՔՊ-ն ունենա կամք եւ գա այդ նիստին, որպեսզի իրենց հակափաստարկները բերեն այն հիմնավորումներին, որ մենք ձեր հետ ձեւակերպել եւ ներկայացրել ենք, որ այս կառավարությունը անելիք չունի: Այս կառավարությունը պետք է հեռանա»,-հավելեց պատգամավորը:
Գոհար ՀԱԿՈԲՅԱՆ
