ԱԺ պետական-իրավական հարցերի մշտական հանձնաժողովի՝ հունիսի 11-ի արտահերթ նիստի օրակարգում ԱԺ «Պատիվ ունեմ» եւ «Հայաստան» խմբակցությունների հեղինակած «Կառավարության հրաժարականի եւ նոր կառավարություն ձեւավորելու անհրաժեշտության մասին» ԱԺ ուղերձի նախագիծն էր:
Հանձնաժողովի նախագահի տեղակալ Արուսյակ Ջուլհակյանը տեղեկացրել է, որ «Ազգային ժողովի կանոնակարգ» ՀՀ սահմանադրական օրենքի համաձայն հիմնական զեկուցողի բացակայության պատճառով հարցի քննարկումը հետաձգվել է մինչեւ 2 ամիս ժամկետով:
Կարդացեք նաև
Այս առնչությամբ «Ազգային ճակատը» տարածել է հետեւյալ հայտարարությունը.
«Հունիսի 10-ին Երևանում տեղի ունեցած բազմամարդ հանրահավաքի դիմումի համաձայն` ՀՀ ԱԺ «Հայաստան» և «Պատիվ ունեմ» խմբակցությունները ԱԺ են մուտքագրել «Կառավարության հրաժարականի և նոր կառավարություն ձևավորելու» վերաբերյալ ԱԺ ուղերձի նախագիծը, որի հիման վրա ԱԺ ընդդիմադիր խմբակցությունների պահանջով և իրավունքի ուժով հունիսի 17-ին պետք է գումարվի ԱԺ արտահերթ նիստ։
Միաժամանակ, ԱԺ ընդդիմադիր խմբակցությունները պահանջել են ուղերձի նախագծի քննարկումը ներառել նաև ԱԺ նիստերի օրակարգ:
Այդ նպատակով հունիսի 11-ին պետք է գումարվեր ԱԺ համապատասխան հանձնաժողովի նիստ:
Իշխող մեծամասնությունն այդ նիստը գումարել է գաղտագողի, առանց հանձնաժողովի ընդդիմադիր անդամների պատշաճ իրազեկման և օրենքի խախտումով: Ավելին, համապատասխան Հանձնաժողովի նիստը գումարվել է ԱԺ կանոնակարգ օրենքի խախտումով, ըստ որի` ԱԺ հանձնաժողովի նիստը չի կարող գումարվել ԱԺ լիագումար նիստին զուգահեռ:
Փաստացի` իշխող մեծամասնությունը փորձել է տորպեդահարել ԱԺ-ի կողմից Շարժման պահանջով հայտարարության քննարկումը ԱԺ-ում, սակայն դա նրանց չի հաջողվել, քանի որ հունիսի 17-ին ԱԺ արտահերթ նիստը գումարվելու է օրենքի ուժով:
Հունիսի 17-ին նախատեսված նիստը, շնորհիվ ընդդիմադիր խմբակցությունների՝ ԱԺ մուտքագրած ուղերձի նախագծի, գումարվելու է»:
