Հասարակական գործիչ Նաիրա Զոհրաբյանի համոզմամբ՝ ՀՀԿ փոխնախագահ Արմեն Աշոտյանի գործով դատաքննությունը հետագայում իրավաբանական դասագրքերում որակվելու է որպես ամենախայտառակ դատական ֆարսերից մեկը:
«Որի վրա ուսանողները պետք է սովորեն, թե ինչու չի կարելի կատարել կեղտոտ քաղաքական պատվերներ: Մի քանի օրից լրանում է մեկ տարին, որ Արմեն Աշոտյանը կալանքի տակ է: Ես սա համարում եմ նաեւ խոշտանգում, որովհետեւ միջազգային բոլոր կոնվենցիաներով՝ այն, ինչ արվում է Աշոտյանի հանդեպ, երբ մեղադրանքն ուղղակիորեն փլվեց դատարանի այս դահլիճում, երբ վկաների ցուցմունքներն ուղղակիորեն չեն ապացուցում այն անհեթեթ թեզը, թե Աշոտյանը լինելով ազատության մեջ՝ կարող է վկաների վրա ճնշում գործադրել, երբ ամբողջ այս գործերը փողերի լվացում, ուղղակի վերացան… այս ամենը մի անբարո քաղաքական ֆարս է, մի մարդու անձնական վրեժխնդրության քաղաքական ֆարս»,- լրագրողների հետ զրույցում ասաց Նաիրա Զոհրաբյանը:
Նրա դիտարկմամբ, Աշոտյանի գործը քննող դատավորի կերպարում իրականում հենց Նիկոլ Փաշինյանն է, որի նպատակն է եղել շուրջ մեկ տարի լռեցնել Աշոտյանին. «Մեկ տարի նիստը նախագահող Փաշինյանի խնդիրը Աշոտյանին լռեցնելն էր, նրա քաղաքական կամքը կոտրելն էր, նրան հնազանդեցնելն էր: Բայց հասկացավ, որ ոչ բոլորն են դառնում հպատակ, վնգստացող, ձեռնասուն, այդ թվում՝ տարբեր ընդդիմադիրներ, որոնց կարող եք փաթեթով գնել, որոնց կարող եք վախեցնել»:
Տիկին Զոհրաբյանը պատասխանեց նաեւ հարցին, թե «Տավուշը հանուն հայրենիքի» շարժման մասնակիցների նկատմամբ իրականացվող քաղաքական հետապնդումներով հնարավո՞ր է շարժումը թուլացնել: Ի պատասխան՝ ասաց. «Երեկ տեսա՝ ինչպես հատակին պառկեցրին Քենիայի քաղաքացիներին, կարծեմ Սարգսյան, այսինքն ՝ փորձում են վախ տարածել: Տեսնում ենք՝ ոնց են իրենց պահում ոստիկանները՝ վահաններով, փշալարերով ու ջրցաններով: Հիշո՞ւմ եք, չէ՞, Նիկոլն ինչ էր ասում` այլեւս երբեք մեր իշխանության ու ժողովրդի միջեւ փշալարեր չեն լինելու: Ձեր փշալարը բամբակի՞ց է: Հասկանո՞ւմ եք այս մարդը անում է բաներ, որոնց դեմ որպես ընդդիմադիր գործիչ պայքարում էր»:
Կարդացեք նաև
Արփինե ՍԻՄՈՆՅԱՆ
