ԱԺ նախկին պատգամավոր Նաիրա Կարապետյանը վստահեցնում է, որ միջազգային շատ խաղացողներ հետաքրքրված են «Տավուշը հանուն հայրենիքի» շարժմամբ:
«Անձամբ ես ստանում եմ նամակներ, որոնցում հետաքրքրվում են թե՛ շարժման մեթոդաբանությամբ, թե՛ նպատակներով, թե՛ ճանապարհային քարտեզով: Մոտ 2 շաբաթ առաջվա քար լռությունը կոտրվել է»,- լրագրողների հետ զրույցում ասաց Նաիրա Կարապետյանը:
Չնայած շարժման նկատմամբ եղած հետաքրքրությանը՝ տիկին Կարապետյանը նկատեց, որ, այնուամենայնիվ, ՀՀ-ում ստեղծված իրավիճակին միջազգային հանրության արձագանքն այն չէ, ինչ պետք է լիներ. «Աղաղակող այս ապօրինությունների ֆոնի վրա պետք է լինեին կոշտ գնահատականներ: Որովհետեւ շարժման հիմնական, ինքնաբուխ քայլերթը սկսվեց, երբ ՀՀ ինքնիշխան տարածքը ինչ-որ մի հանձնաժողովի քմահաճ, միակողմանի որոշման հիման վրա առանց ունենալու ամբողջական բանակցված փաստաթղթի, չեմ խոսում այն մասին, որ սահմանազատումն ու սահմանագծումը կատարվում է խաղաղության պայմանագրի ստորագրումից հետո: Եթե կան տարածքներ, որոնք ՀՀ-ին են պատկանում, քարտեզի փոփոխությունը տեղի է ունենում Սահմանադրությամբ: Այս փաստերը ներկայացվել են միջազգային հանրությանը, որեւէ դատապարտում, կոշտ գնահատական չենք լսում ինստիտուցիոնալ առումով: Սա կապում եմ նրա հետ, որ այս տարածաշրջանում Արեւմուտքի շահերը խիստ փոխկապակցված են Փաշինյանի օրակարգի հետ: Գլոբալիստական ուժերը հովանավորում են թուրքական օրակարգը, իսկ այդ օրակարգի կատարողն այսօր ՀՀ-ում Նիկոլ Փաշինյանի կառավարությունն է»:
Կարդացեք նաև
Արփինե ՍԻՄՈՆՅԱՆ
