«Տավուշը հանուն հայրենիքի» շարժման անդամ, ԱԺ «Հայաստան» խմբակցության պատգամավոր Գառնիկ Դանիելյանն այսօր լրագրողների հետ զրույցում անդրադարձավ ավելի վաղ արած իր հայտարարության՝ ՔՊ-ականների արձագանքին։
Դանիելյանը հայտարարել է, որ ՔՊ-ական պատգամավորների ընտանիքի անդամներն ել են մասնակցում շարժման ցույցերին։
Լրագրողի դիտարկմանը՝ ՔՊ-ից հերքել են, որ իրենց ընտանիքի անդամները միացել են շարժմանը կամ մասնակցում են ցույցերին, արդյոք Դանիելյանը կարո՞ղ է նշել, թե ՔՊ-ականների հարազատներից քանի՞սն են մասնակցել ցույցերին, պատգամավորը պատասխանեց՝ չեմ հաշվում, թե քանի հոգի են․ «Համենայնդեպս, այս ընթացքում իրենց հարազատներից բազմաթիվ մարդիկ մոտեցել եւ ասել են, որ իրնեց հարազատն են։ Անուններ չեմ ուզում տալ։ Այնպես չէ, որ միայն իրենց հարազատներ են, տարբեր խոսակցությունների ժամանակ բազմաթիվ պաշտոնյաներ ասում են, որ պատանդի կարգավիճակում են եւ այն, ինչ տեղի է ունենում Հայաստանում, իրենց մտահոգում է, իրենք ապշած են, թե ինչ է կատարվում, մտավախություններ ունեն Հայաստանի հետագա ընթացքի վերաբերյալ»։
Պատասխանելով լրագրողի դիտարկմանը, որ ԱԺ նախագահ Ալեն Սիմոնյանն ասել է, թե շարժման անդամները ռեւանշիստներ են, Դանիելյանն ասաց ՝ այդ մարդիկ կրկնում են ադրբեջանական հայտարարությունները, Ադրբեջանն ինչ ասում է, նրանց համար դառնում է նորմ․ «Ադրբեջանը ինչ հայտարարում է, րոպեներ հետո ՀՀ իշխանությունն է կրկնում։ Ասում են` Սահմանադրությունը պիտի փոխեք, ասում են՝ հա, պիտի փոխենք, մի օր էլ կասեն` դրոշը լավը չի, դրոշն էլ պիտի փոխենք։ Ադրբեջանը մի օր էլ պահանջելու է 90-ականների պատերազմի մասնակիցներին հանձնել ադրբեջանական արդարադատությանը»։
Կարդացեք նաև
Դանիելյանն ասաց, որ ՀՀ սահմանների անվտանգությունն ապահովված չէ, մինչդեռ շարժմանը վերահսկում են հազարավոր զինվորներ, ոստիկաններ, հատուկ նշանակության ջոկատներ․ «Ամեն ծառի տակ հատուկ ծառայությունների աշխատողներ կան, ամեն մարդուն՝ մի 15-20 հատուկ ծառայության աշխատող։ Ինձ ամբողջ օրը հետեւում են, ուզում եմ արդեն բարիդրացիական հարաբերություններ հաստատեմ հետները։ Առավոտը տանից դուրս եմ գալիս, ուղեկցում են, գնում եմ սրճարան, հետեւում են՝ ում հետ սրճեցի, գրկախառնվեցի, համբուրվեցի։
Կես տարի առաջ, երբ գնացել է Սյունիք, Կոռնիձորում, էդ որ սահման չկար, ասացին որ որտեղ հայտնվել ենք ադրբեջանցիներ են, մի քանի մետր էր մնացել, որ ադրբեջանցիները մեզ գերի վերցնեին։ Այսինքն, սահմաններն այնքան ազատ ու բաց են, որ կարող են ներթափանցել»։
Մանրամասները՝ տեսանյութում
Նելլի ԲԱԲԱՅԱՆ
